Ministri i Kulturës, Rinisë dhe Sportit, Kujtim Gashi, ka mbledhur artistë dhe punonjës të institucioneve të kulturës për të festuar rritjen e pagave.

Me këtë rast janë ndarë dhe mirënjohje për disa punonjës të institucioneve vartëse të MKRS-së të cilët janë pensionuar kohëve të fundit.

Një organizim i tillë ishte planifikuar të bëhej qysh kur Qeveria e Kosovës kishte miratuar Rregulloren nëpërmjet të cilës u janë ngritur pagat krijuesve, performuesve dhe punonjësve të trashëgimisë kulturore.

Ministri Kujtim Gashi ka thënë se artistët janë ambasadorët e vërtetë të promovimit të shtetit dhe kulturës tonë në mbarë botën. Ai ka vlerësuar punën e shkëlqyeshme të tyre.

“Pasi ngritëm pagat për krijuesit, përformuesit dhe punëtorët profesional të trashëgimisë kulturore, sonte, komuniteti artistik organizoi një mbrëmje në shenjë mirënjohje e falënderimi për ne, për përkushtimin tonë të përbashkët që këtij komuniteti t’ia kthejmë dinjitetin e merituar, duke i siguruar paga dhe kushte më të mira”, ka thënë Gashi.