Autoriteti i Konkurrencës heton KEDS-in dhe KESCO-n

Prishtinë | 03 Dhj 2020 | 22:49 | Nga Ekonomia Online

Autoriteti i Konkurrencës këtë të premte do të nisë zyrtarisht procedurat për hetimin ndaj ndërmarrjeve KEDS dhe KESKO të cilat operojnë në tregun e energjisë elektrike.

Sikur mëson Klan Kosova përmes burimeve, dyshimet e Autoritetit të Konkurrencës – të cilat janë ngritur pas shqyrtimit paraprak – janë se këto ndërmarrje kanë shkelur nenet 4 dhe 11 të Ligjit për Mbrojtjen e Konkurrencës.

Më konkretisht, dyshohet se këto ndërmarrje kanë bërë marrëveshje të ndaluar apo praktikë të bashkërenduar dhe kanë abuzuar me pozitën dominuese.

Siç mëson Klan Kosova, KEDS kishte kushtëzuar investitorët, që ku është bërë investimi i trafostacionit, përveç pajisjeve por edhe pronën ku gjendet trafostacioni të bartet në pronësi të KEDS-it, në të kundërtën nuk ua lëshon rrymën.

Autoriteti i Konkurrencës pritet të mbajë të premten një konferencë për media ku siç merret vesh edhe zyrtarisht do të kërkohet përfshirja e Prokurorisë Speciale për t’i hetuar këto dyshime. Ditë më parë kreu i AKK-së, në rrjetet sociale kishte kërkuar ndihmën e Prokurorisë Speciale për të hetuar një rast porse nuk kishte dhënë detaje të tjera.

Të ngjashme