Përfaqësuesi i Lartë i BE-së, Josep Borrell, ka marrë pjesë sot në nënshkrimin e marrëveshjes së gjelbër për Kosovën – rinovimi i Termocentralit “Kosova B”.

Gjatë kësaj ceremonie Borrell ka thënë se është i kënaqur që në emër të BE-së t’i ofrojë 76 milionë euro për ta ndihmuar Kosovën në çështjen e trajtimit të ajrit, njofton Klan Kosova.

“Është nder i madh që të jem këtu me ju sot. Sipas zotimit tim personal, unë jam këtu që ta sjell më afër Kosovën drejt standardeve të BE-së. Energjia dhe Mjedisi janë shumë të rëndësishme”.

“Është e rëndësishme që të kujdesemi për të tanishmen dhe për të ardhmen. Kosova ka nevojë për lumenj dhe ajër më të pastër. Natyra duhet të ruhet për gjeneratat që vijnë pas nesh. Prishtina është në mesin e qyteteve më të ndotura në botë”.

“Në përgjithësi Termocentralet e thëngjillit janë dëmtuesit e ajrit më të madh në botë. Ndotja e ajrit vret, ndotja e ajrit do të thotë jetë më të shkurtër – për këtë arsye nevojiten veprime konkrete në këtë drejtim”.

“Sot jemi këtu që të shënojmë një investim të madh nga Bashkimi Europian. Jemi të kënaqur që të ofrojmë 76 milionë euro që ta ndihmojmë Kosovën në çështjen e trajtimit të ajrit”.

“Kjo vije si mbështetje shtesë të cilën e kemi ofruar tashmë për Kosovën gjatë 10 vjetëve të fundit. BE ka ofruar më shumë se një miliard euro mbështetje për vendin tuaj dhe unë jam krenar ta them këtë”.

“Për mua është një kënaqësi që ta ndajmë këtë moment ku ne e lansojmë këtë punë ku do të përfitojë shumë komuna juaj dhe tërë Kosovë në përgjithësi. Për këtë arsye kam punuar shumë në këtë agjendën e gjelbër”.

“Shpresojmë që në Zagreb kur ta kemi takimin e radhës me BE-në, vendet e Ballkanit do të jenë aty për ta bërë punën se bashku në mënyrë që t’u dalim ballë sfidave”.