Hamza: Nëse programi i qeverisë s’është i bazuar në buxhetin real, mbetet vetëm “fontanë dëshirash”

Prishtinë | 29 Shk 2020 | 11:09 | Nga Fitore Berisha Shkarko Videon HD

Për ta shkarkuar videon ju lutem kyçuni ose regjistroni një llogari të re!

| Regjistrohu

Qeveria Kurti është zotuar se gjatë mandatit 4 vjeçar buxheti i shtetit do të arrijë në 3 miliardë euro. Ish-ministri i Financave, Bedri Hamza, njëherësh shef i deputetëve të partisë më të madhe opozitare, PDK-së, në një prononcim për Ekonomia Online, ka thënë se Qeveria ende nuk e ka dorëzuar një draft-buxhet për ta parë se çka ofron ai dhe se si është paraparë kjo rritje.

Hamza në mandatin e të cilit buxheti i shtetit u rrit rreth 300 milionë euro pret nga qeveria Kurti që planifikimin e buxhetit ta ketë bërë në bazë të gjendjes reale, në mënyrë që të jetë një buxhet i qëndrueshëm dhe i realizueshëm.

“Qeveria e ka thënë se sa do të jetë buxheti, ne ende nuk e kemi marrë draft-buxhetin, dhe ende nuk është aprovuar në qeveri. Po presim që qeveria të na sjellë buxhetin mbi bazën e asaj se çka na ofron ne ta shohim a është buxhet i qëndrueshëm, a është buxhet i realizueshëm apo bazohen në qëndrime të financimit. A janë respektuar rregullat fiskale në fuqi dhe a janë reflektuar prioritet e qeverisë që ne ende nuk i kemi një program të qeverisë që mundim me pa se cili është program i qeverisë”, ka thënë ai.

Ish-kreu i MF-së, beson se trendi i rritjes ekonomike do të vazhdojë, por do të varet nga puna e qeverisë se sa do të jetë ajo rritje.

Ai ka thënë se si opozitë do të analizojnë buxhetin e propozuar nga qeveria dhe më pas do të vendosin nëse do ta përkrahin.

“Nëse flitet për një program dhe nuk gjen vend në buxhet ai më tepër është fontanë dëshirash sesa një plan konkret. Rritja ekonomike do të vazhdojë, predispozitat janë që rritja të jetë pozitive, tashmë varet prej punë edhe qeverisë se në çfarë niveli do të jetë rritja ekonomike. Rritjen e buxhetit duhet ta implementojë qeveria. Ne opozita jemi për të dhënë alternativë, aty ku ka vend për kritika por jo të pa argumentuara, mirëpo ne ende nuk e kemi marrë’’, ka thënë ai.

Duke komentuar shkarkimet e fundit të qeverisë Kurti, Hamza ka sugjeruar që të respektohet ligji dhe procedurat.

 ‘’Gjithçka duhet të bëhet mbi bazën e rregulloreve. Çdo gjë që bëhet jashtë rregulloreve, duke mosrespektuar ligjin mund të shkelë të drejtën e palës, mundet me krijua dëm për buxhetin. Ndryshimet nëse nuk prodhojnë efekt konkret në përmirësimin e gjendjes atëherë është dëm’’, ka thënë ai.

Ministria e Financave e drejtuar nga Bedri Hamza ka finalizuar projekt-buxhetin për vitin 2020 në vlerë prej 2 miliardë e 467 milionë euro, buxhet ky më i lartë se ai i vitit të kaluar.

Përkundër kësaj ky buxhet nuk parasheh që të realizohet përmes vendosjes së një tatimi të ri apo rritjes së tatimeve ekzistuese.

Lexo më shumë:

Të ngjashme