Kompania Rajonale e Ujësjellësit “Prishtina” njofton të gjithë konsumatorët në zonën e shërbimit si, Prishtinë, Fushë Kosovë, Obiliq, Lipjan, Drenas, Podujevë, Shtime dhe Graçanicë se, duke filluar nga dita e sotme 22 tetor 2019 janë duke vepruar në teren, për të vëzhguar më për së afërmi keqpërdorimet.

Sipas kompanisë, qëllimi i këtij aksioni është verifikimi i konsumatorëve që keqpërdorin ujëmatësit, identifikimi i kyçjeve ilegale si dhe verifikimi i objekteve të reja që e shfrytëzojnë ujin e pijshëm e që ende nuk janë regjistruar si konsumatorë të KRU “Prishtina”.

“Kontrollime do të ketë në të gjitha zonat e operimit, e sot duke filluar nga fshati Llukar, rruga ‘Bajram Bahtiri’ në Prishtinë, duke vazhduar në lagjen Veternik, Hajvali, etj., me ç’rast ditën e shtunë më 26 tetor ekipi të kontrollës do i bashkëngjiten edhe ekipet e shkyçjes. Po fillojmë me zonat e lartë cekura duke vazhduar më pas edhe me zonat e tjera të shërbimit, gjithnjë duke u bazuar në të dhënat që kemi, që në këto zona po keqpërdoren ujëmatësit”, thuhet në njoftimin e KRU “Prishtina”, përcjell telegrafi. Në fund, kompania thotë se përmes kontrollorëve në teren do të veprojë deri në fund të vitit.