Qeveria e udhëhequr nga Ramush Haradinaj po mohon lajmet se Shtetet e Bashkuara kanë dërguar ultimatum për heqje të taksës.

Lajmet se institucionet e Kosovës kanë marrë mesazh të përcjellë përmes kanaleve diplomatike ku ceket se duhet të hiqet taksa, si dhe shprehet zhgënjim që edhe pas letrës të dorëzuar nga presidenti amerikan Donald Trump nuk ka pasur reflektim nga pala kosovare, janë mohuar nga Qeveria.

Në një përgjigje për Gazetën Express, shefi i kabinetit të kryeministrit, Avni Arifi ka thënë shkurtimisht se nuk kanë marrë asnjë kërkesë të tillë.

“Qeveria konfirmon se nuk kemi marrë zyrtarisht asgjë nga SHBA”, është deklaruar ai.

Sipas disa lajmeve që kanë qarkulluar gjatë ditës në media, thuhet se Këshilli i Sigurisë Kombëtare të SHBA-së dhe Departamenti i Shtetit Amerikan kanë kërkuar heqje të menjëhershme të taksës, të përmbledhur në tetë pika.

Në këto pika thuhet se nëse nuk suspendohet tarifa, do të suspendohet edhe asistenca në fushën e sigurisë dhe se me këto sjellje Kosova po rrezikon miqësinë me Shtetet e Bashkuara.