“Dëshiroj të ju informoj se Marrëveshja Bilaterale për Sigurime Sociale, ende nuk është nënshkruar. Grupet teknike që kanë qenë të emëruara për negocimin e marrëveshjes për sigurime sociale në mes të Kosovës dhe Zvicrës, kanë përfunduar draftin final të marrëveshjes për sigurime sociale, pastaj marrëveshjen administrative për zbatimin e marrëveshjes për sigurimet sociale dhe janë pajtuar për formën e formularëve që do të përdoren për shkëmbimin e të dhënave të kërkuara nga të dyja palët, praktikisht, individët që parashtrojnë kërkesat”.

“Për të gjitha këto veprime, ekzistojnë procesverbalet në të gjitha fazat e negocimit, deri në përmbylljen e bisedimeve. Për informimin tuaj, më datë 1 qershor të vitit 2017, ka pasur vetëm nënshkrim të teksteve finale të draftit të marrëveshjes së përgjithshme dhe draftit final të marrëveshjes administrative dhe këto janë nënshkruar nga kryesuesit e grupeve teknike të të dy delegacioneve, pas përfundimit të negociatave”, theksoi Reçica.

“Për informimin e të gjithë qytetarëve, për këtë çështje mjaft të rëndësishme, ju informoj se nga ana jonë si Qeveri nuk është shkaktuar asnjë vonesë. Personalisht, me të marrë detyrën si Ministër i Punës dhe Mirëqenies Sociale, kam qenë dhe jam në kontakt të vazhdueshëm më autoritetet zvicerane dhe me ambasadorin e Zvicrës në Kosovë, Jean Hubert Lebet”.

“Ju informoj se dje kam pasur komunikimin e fundit me ambasadorin dhe në bazë të informatave që kam marrë nga autoritetet zvicerane, së shpejti do ta kemi datën për nënshkrimin e kësaj marrëveshje ndërshtetërore”.

“Shpresojmë që kjo të ndodhë nga fundi i muajit mars, përkatësisht, fillimi i muajit prill dhe vetëm pas nënshkrimit të kësaj marrëveshje, do të dërgohet për miratim në parlamentet respektive”, ka shpjeguar Reçica.