Ymeri: Nuk është koha të rriten tani pagat, shteti duhet të ndërhyjë që të mbajë çmimet e produkteve bazë

Prishtinë | 02 Mar 2022 | 07:46 | Nga Lindita Berisha Shkarko Videon HD

Për ta shkarkuar videon ju lutem kyçuni ose regjistroni një llogari të re!

| Regjistrohu

Vendi mund të përballet me krizë të furnizimit me drithërave, për shkak të luftës në Ukrainë, i tha Ekonomia Online ish-kreu i Vetëvendosjes, Visar Ymeri.

Prandaj sipas tij, Qeveria Kurti duhet që të marrë masa të menjëhershme për rritjen e fondit për rezervar shtetërore. 

Këshilla për ish-partiakun e tij, Ymeri pati edhe sa i përket rritjes së çmimeve.

Drejtori i Institutit për Politika Sociale “Musine Kokalari” shtoi se duhet pasur kujdes që të mos rriten çmimet e produkteve bazë, ngase kjo mund të rrezikohet rritje e inflacionit e që do të shkaktonte një zinxhir më të dëmshëm për ekonominë.

Ymeri tutje ka shtuar se Qeveria duhet të intervenojë përmes rezervave shtetërore të mirëmbajë këtë çmim që ka e jo të rrisë pagat, sepse vendi mund të futet në një cikël të rrezikshëm të inflacionit.

“Çështja është që së pari diçka urgjente që është dashur të bëhet është që të rritet fondi i rezervave shtetërore për sa i përket artikujve bazë, veçanërisht grurit dhe drithërave, sepse siç po shihet lufta në Ukrainë do të krijojë një krizë të re në zinxhirin global të furnizimit me drithëra. Edhe shtetet e rajonit kanë filluar me përgatitje, nënshkrimin e kontratave afatgjate të blerjes së produkteve të nevojshme ushqimore. Këtë gjë do të duhej ta bënte urgjentisht Qeveria e Republikës së Kosovës”.

“Çështja e dytë është që duhet të kemi kujdes që ta mbajmë për aq sa është e mundur çmimin e produkteve bazë, bukës dhe produkteve të tjera nga mielli dhe drithërat në nivelin e caktuar. Sepse po lejuam se ky çmim të rritet dhe pastaj ta rrisim deri diku kapacitetin blerës të qytetarëve përmes shtimit të formave të transfereve sociale, kjo pastaj mund të rrezikojë një rritje shtesë të inflacionit dhe shkakton një zinxhir shumë më të dëmshëm për ekonominë”.

Madje ai thotë se nuk duhet që të rriten pagat, por të mirëmbahen çmimet aktuale, duke shtuar se krizë energjetike globale është shfrytëzuar në vend për rritjen e tarifave të energjisë për një periudhë më të gjatë, raporton EO.

“Qeveria do të duhet të intervenonte përmes rezervave shtetërore që ta mirëmbajë çmimin që e kemi aktualisht në treg, e jo t’i rrisë rrogat për me pasë mundësi me ble më shumë, sepse kjo pastaj më shumë e rritë çmimin dhe futemi në një cikël të rrezikshëm të inflacionit”.

“Kjo rritje e çmimeve edhe pse është bërë për shkak të krizës energjetike që ka qenë gjatë këtij dimri e që supozohet të vazhdojë më së largu deri në qershor, kjo rritje është bërë një periudhë njëvjeçare. Ne do të paguajmë tarifa më të shtrenjta për një periudhe edhe pse kriza energjetike nuk pritet të zgjat deri në fund të vitit”.

Ymeri vlerëson se puna më e mirë që e kanë bërë deri më tani Qeveria Kurti është menaxhimi i pandemisë, respektivisht vaksinimi për një kohë të shkurtë i një numri të madh të qytetarëve.

Teksa shtoi se rritja e madhe ekonomike në këtë kohë nuk lidhet me politikat qeveritare.

“Një prej punëve më të mira që e ka bërë kjo Qeveri është procesi i vaksinimit që nga momenti i sjelljes së vaksinave. Organizimi i procesit të vaksinimit dhe arritja e shifrave të mëdha të vaksinimit për një kohë relativisht të shkurtë ka qenë një sukses gogja i madh që mendoj se duhet përshëndetur.

Çështje të tjera pastaj ka qenë një ‘bum’ ekonomik që po ndodh në Kosovë. Unë këtë personalisht nuk mundem me lidh fare me politika qeveritare sepse nuk e di se si dhe cila politikë ka ndikuar, por kjo më shumë është një lloj kthimi ekonomik pas rënies ekonomike të krizës për shkak të pandemisë dhe pastaj natyrisht edhe një shumë e madhe e parave që kanë ardhur në formën e remitencave dhe forma të tjera nga mërgata e Kosovës të cilat e kanë rritë aktivitetin dhe dinamiken ekonomike”, tha Ymeri.

Lexo më shumë:

Të ngjashme