Politikanja demokrate në Shtetet e Bashkuara të Amerikës, Alexandria Ocasio-Cortez, ka thënë se është një e mbijetuar e sulmit seksual.

Derisa foli për këtë ngjarje të jetës së saj, ajo akuzoi republikanët që nuk e pranojnë fajin për trazirat e muajit të kaluar në Kongresin amerikan. Ajo tha se ata po përdorin “taktika të abuzuesve”, shkruan BBC, transmeton Klan Kosova.

“Unë jam një e mbijetuar e sulmit seksual”, tha politikanja mes lotësh.

“Dhe nuk ua kam treguar shumë njerëzve këtë në jetën time”, shtoi ajo.

Ocasio-Cortez është një nga demokratet e profilit më të lartë në Kongres. Në një lidhje të drejtëpërdrejtë në Instagram, 31-vjeçarja zbuloi shumë pak në lidhje me sulmin seksual.

Kongresistja tha se ishte e përgatitur për kritika pasi ndau përvojën e saj të sulmit seksual, pasi ajo nuk ishte e lidhur drejtpërdrejt me trazirat në Kongres. Por, ajo ka bërë ndërlidhje të traumave të cilat, sipas saj, mund të komunikojnë me njëra-tjetrën.

“Të gjitha traumat tuaja mund të kryqëzohen dhe të bashkëveprojnë”, tha ajo.

Atë ditë ajo tha se ishte në zyrën e saj kur dëgjoi trokitje në derë, sikur dikush po përpiqej të hynte. Drejtori i saj legjislativ i tha asaj që të fshihej, dhe ajo hyri në tualet. Pastaj dëgjoi një burrë që bërtiste dhe po përpiqej ta gjente.

Më 6 janar turma të mbështetësve të ish-presidentit, Donald Trump, sulmuan ndërtesën e Kongresit në përpjekje për të përmbysur rezultatin zgjedhor.