Policia ruse ka arrestuar së paku 400 persona gjatë protestave mbarëkombëtare në thirrje të lirimit të liderit opozitar rus, Alexei Navalny, shëndeti i të cilit është rënduar gjatë mbajtjes në një burg në periferi të Moskës.

Me gjithë vendosjen e bllokadave nga policia, një turmë e madhe e qytetarëve është mbledhur nëpër rrugët kryesore të kryeqytetit dhe në të paktën 160 qytete të tjera të vendit.

Turmat janë përplasur me forcat e policisë, që janë përpjekur t’i ndalin tubimet e cilësuara si të paligjshme.

Mbështetësit e kritikut të Kremlinit kanë paralajmëruar se Navalny mund të vdes në burg dhe kërkojnë që atij t’i ofrohet kujdesi adekuat shëndetësor.

44-vjeçari Navalny ishte arrestuar në janar, menjëherë pas kthimit nga Gjermania, ku i ishte trajtuar shërimit nga helmimi me agjentin nervor, Noviçok.

Opozita ruse dhe Perëndimi kanë akuzuar Moskën për tentimvrasjen e tij ndërsa Rusia ka hedhur poshtë përfshirjen.