Fushata e vaksinimit në Gjermani është përballur me shtyrje në disa qytete sot, pasi stafi mjekësor ka gjetur parregullësi në ftohjen e vaksinës së prodhuar nga Pfizer/BioNTech, shkruan agjencia Reuters.

Shtetet e Bashkimit Evropian kanë filluar vaksinimin kundër COVID-19 në fundjavë, ndërsa pensionistët dhe mjekët kanë qenë të parët që janë vaksinuar.

“Duke lexuar matësit e temperaturave u lindën dyshimet në lidhje me atë nëse vaksinat janë mbajtur në temperaturë optimale”, është thënë nga Zyra e Qarkut të Lichtenfelsit në shtetin verior gjerman, Bavari.

Vaksina e Pfizerit, që përdor teknologjinë e ashtuquajtur mRNA, duhet të qëndrojë në temperatura shumë të ulëta -70 gradë Celsius për të mbetur efikase para se të dërgohet në qendra ku kryhet vaksinimi.

Pfizeri ka dizajnuar kontenierë të veçantë për transportim të tyre. Vaksinat mund të mbahen në temperatura shumë të ulëta deri në gjashtë muaj, apo për pesë ditë në temperatura 2 deri 8 gradë Celsius – në një frigorifer të zakonshëm që gjenden në spitale.

Pos në Lichtenfels, edhe në qytetet veriore bavareze si Coburg, Kronach, Kulmbach, Hof, Bayreuth dhe Wunsiedel, ka ndaluar vaksinimin për shkak të pasigurisë në lidhje me atë nëse vaksinat janë mbajtur në temperatura të duhura.

“Vaksinimi kundër koronavirusit nuk ka të bëjë me atë se kush vaksionon më shpejt apo kush jep më tepër doza. Siguria është prioritet”, ka thënë Oliver Baer, administrator nga qarku Hof.

Probleme të ngjashme janë shfaqur edhe në qytetin jugor bavarez Augsburg, ka raportuar gazeta “Merkur”.

Vaksinimi në Gjermani ka nisur sot, ku të parët që po vaksinohen janë të moshuarit në shtëpi të kujdesit. Qeveria federale planifikon të shpërndajë rreth 1.3 milionë doza të vaksinës te autoritetet lokale deri në fund të vitit dhe rreth 700 mijë në javë nga janari.

Vaksinimi do të jetë falas për të gjithë nga mesi i vitit 2021, pasi që grupet e prioritetit të lartë të vaksinohen.

“Kjo na bën krenar dhe mbi të gjitha mund ta tejkalojmë këtë pandemi, pasi vaksinimi hap rrugën për përfundimin e kësaj krize”, ka shkruar në Twitter ministri gjerman i Shëndetësisë, Jens Spahn.