Qytetarët e Kosovës nuk patën mundësinë as të votojnë e as ta shikojnë MTV Video Music Awards 2018

Prishtinë | 21 Gus 2018 | 19:33 | Nga

Mbrëmë (e hënë) në Radio City Hall të New Yorkut është mbajtur ceremonia e madhe e ndarjes së çmimeve, MTV Video Music Awards.

Rita Ora dhe Bebe Rexha ishin dy këngëtaret shqiptare, të cilat shkëlqyen me dukjen dhe paraqitjen e tyre në këtë event të përmasave gjigante.

Rita Ora dhe Bebe Rexha mbrëmë në MTV Video Music Awards 2018 (Foto: Getty Images)

Madje Rita Ora arriti të rrëmbejë edhe një çmim, atë për “Këngën më të mirë ritmike”, për bashkëpunimin “Lonely Together” me DJ Aviciin.

Por megjithëse shqiptarët e Kosovës u përfaqësuan denjësisht nga dy shqiptare në mbrëmjen e MTV VMA, ata nuk patën mundësinë që ta ndjekin atë në transmetim direkt, të paktën jo sipas mënyrës legale.

Skena e MTV Video Music Awards 2018 (Foto: Getty Images)

MTV nuk e njeh Kosovën si shtet, dhe si rrjedhojë nuk i ka lejuar shqiptarët e Kosovës që të votojnë për këngët konkurruese, e aq më pak edhe ta shikojnë mbrëmjen e ndarjes së çmimeve.

Nëse një qytetar tentoi të votojë ose ta shikojë eventin brenda rrjetit kabllor në territorin e Kosovës, ishte e pamundur, ngase MTV lajmëronte që në start që transmetimi dhe votimi “nuk janë aktiv në regjionin tuaj”.

Qytetarët e Kosovës nuk patën të drejtë votimi në MTV Video Music Awards 2018 (Foto: Mtv.com/Screenshot)

Edhe personat që kanë tentuar ta shikojnë në live stream mbrëmjen e ndarjes së çmimeve, e kanë pasur të pamundur një gjë të tillë, pasi MTV refuzoi ta transmetojë në lidhje direkte shfaqjen edhe për fansat e Kosovës.

Krejt kjo mund të ndodh për faktin se Kosova ende nuk është pjesë e Unionit të Transmetuesve Evropianë (EBU), dhe si pasojë nuk gëzon të drejtat si çdo shtet tjetër për të votuar ose parë eventin, megjithëse për ta parë është një e drejtë legjitime që nuk duhet të jetë e censuruar në mbarë botën.

Shqiptarët e Kosovës nuk gëzuan as të drejtën e kyçjes live stream për ta parë eventin MTV Video Music Awards 2018 (Foto: Mtv.ca/ScreenShot)

E vetmja mënyrë që shqiptarët e Kosovës kanë ndjekur MTV Video Music Awards ka qenë përmes rrjeteve kabllore ilegale që rëndom operojnë në disa prej regjioneve të vendit.

Sido që të jetë, shqiptarët e Kosovës u ndjenë krenarë me suksesin e Rita Orës në këtë event, e cila rrëmbeu çmimin e parë të MTV-së në karrierën e saj.

Rita Ora rrëmbeu çmimin “Best Dance” në MTV Video Music Awards (Foto: Getty Images)

Ndryshe nga Ora, pa shpërblime mbeten dy shqiptaret tjera, Bebe Rexha (e cila ishte e nominuar në vetëm një kategori), dhe Dua Lipa (e cila ishte e nominuar në tri), ndërsa kjo e fundit as nuk u pa e pranishme në event./Telegrafi/

Fjalë Kryesore:

Të ngjashme