Dhjetë pikturat më të kërkuara në botë

Prishtinë | 18 Dhj 2019 | 17:58 | Nga Ekonomia Online

Çdo vit, vepra arti që bashkërisht vlejnë miliarda dollarë, kalojnë nëpër shtëpitë e ankandeve në mbarë botën. Por, të pakta janë krijimet për t’u cilësuar vërtet si “më të mirat”.

CNN Style iu drejtua Google-it për të parë se cilat piktura kanë kryesuar kërkimet në internet anekënd globit gjatë pesë viteve të fundit. Bazuar në këto rezultatet, më poshtë janë 10 pikturat më të kërkuara në botë:

1. “Mona Lisa” kryeson renditjen dhe nuk ka përse çuditemi: është piktura më e famshme në botë e gruas misterioze me buzëqeshjen enigmatike. Dhe, të mendosh që përpara shekullit XX, siç thonë historianët, “ Mona Lisa“ njihej shumë pak jashtë rretheve të artistëve.

2. “Darka e fundit” bën që Leonardo të jetë i vetmi artist i cili shfaqet dy herë në këtë listë. E pikturuar në një epokë kur imazhet fetare ishin ende një temë artistike mbizotëruese, “Darka e Fundit” përshkruan herën e fundit kur Jezusi ndau bukën me dishepujt e tij përpara kryqëzimit. Piktura është një afresk i madh – 4,6 metra i lartë dhe 8,8 metra i gjerë, gjë që e bën pamjen e tij të paharrueshme.

3. “Nata me yje” e Van Gogh-ut – një prej pikturave më të bukura të mjeshtrit të madh, e cila përcjell të gjithë stilin e rrallë të tij përmes penelatave të trasha, të guximshme dhe inovative. Format dhe ngjyrat e jashtëzakonshme të saj i kanë intriguar artdashësit për dekada të tëra.

4. “Ulërima” e Eduard Munch-it, një vepër që nuk harrohet lehtë, e që ka dhe një karakteristikë: sipas blogut të Muzeut Britanik, ekzistojnë dy piktura, dy pastele dhe më pas një numër i papërcaktuar skicash për të. Në vitin 2012, një nga pastelet u shit për gati 120 ëmilion dollarë në ankand.

5. “Guernica” e Pablo Picasso-s është një prej punëve më madhështore të piktorit gjenial dhe tregon bombardimin e qytetit bask me të njëjtin emër gjatë Luftës Civile në Spanjë.

6. “Puthja” e Gustav Klimt-it vjen nga “Periudha e Artë” e artistit austriak. Ndikimet artistike bizantine mund të shihen në rrobat tejet dekorative të personazheve të tij, ndërsa pasioni shpërthen mes penelatave të forta të piktorit.

7. “Vajza me vath perle”, nga Johannes Vermeer është krahasuar shpesh me “Mona Lisan” – një kryevepër në vaj mbi kanavacë që është praktikisht një shembull brilant thjeshtësie.

8. E kërkuar mbetet dhe “Lindja e Venerës” nga Sandro Botticelli, ku autori ka krijuar në mënyrë të paharrueshme perëndeshën e dashurisë.

9. “Zonjat e oborrit” nga Diego Velázquez , është jo vetëm më e famshmja e tij, por edhe vepra që ka përmasat më të mëdha që u kërkua nga Filipi I IV-të i Spanjës.

10. “Krijimi i Adamit”, mrekullia e Michelangelos në kapelën Sikstine konsiderohet si një prej pamjeve më të kopjuara në histori.

Të ngjashme