Aktakuzë ndaj Pal Lekajt dhe dy ish-zyrtarëve komunalë

Prishtinë | 14 Shk 2017 | 15:41 | Nga

Prokuroria Speciale e Republikës së Kosovës, ka ngritur sot aktakuzë, ndaj  ish-kryetarit të Komunës së Gjakovës, Pal Lekaj, tashmë deputet nga radhët e AAK-së, së bashku me ish-Drejtorin për Buxhet dhe Financa dhe me ish-menaxherin e Prokurimit, për veprën penale, “Keqpërdorimi i pozitës apo autoritetit zyrtar nga neni 422 paragrafi 1 lidhur me paragrafin 2 nën paragrafit 2.4 dhe lidhur me nenin 31 të Kodit Penal të Republikës së Kosovës”.

Ekonomia Online, ka provuar të kontaktojë me deputetin Lekaj, por i njëjti nuk është lajmëruar.

Ky është njoftimi i plotë i PSRK-së:

Prokuroria Speciale e Republikës së Kosovës, ka ngritur sot aktakuzë, pranë Departamentit për Krime të Rënda të Gjykatës Themelore në Gjakovë, kundër tre (3) të pandehurve për veprën penale: “Keqpërdorimi i pozitës apo autoritetit zyrtar nga neni 422 paragrafi 1 lidhur me paragrafin 2  nën paragrafit 2.4 dhe lidhur me nenin 31 të Kodit Penal të Republikës së Kosovës”.

I akuzuari i parë, ish – Kryetar i Komunës së bashku me ish-Drejtorin për Buxhet dhe Financa dhe me ish-menaxherin e Prokurimit, po të njëjtës komunë gjatë muajit mars të vitit 2012, në bashkëkryerje duke kontribuar esencialisht në raport me njëri tjetrin, duke shfrytëzuar detyrat apo autoritetin zyrtar kanë tejkaluar kompetencat dhe autorizimet e tyre  më qëllim që të përfitojnë çfarëdo dobie për vete apo personin tjetër, që ti shkaktojnë  dëm Komunës dhe banorëve të saj.

Sipas aktakuzës së PSRK-së, njëri nga tre të akuzuarit është ish-Kryetar i Komunës, e një ish-Drejtor për Buxhet dhe Financa dhe ish-Menaxher i Prokurimit, ndërkaq të akuzuarit janë: P.L., Q.M. dhe N.Ll.

Të akuzuarit me këto veprime kanë kryer veprën penale “Keqpërdorimi i pozitës apo autoritetit zyrtar nga neni 422 paragrafi 1 lidhur më paragrafin 2  nën paragrafit 2.4 dhe lidhur me nenin 31 të Kodit Penal të Republikës së Kosovës”.

Aktakuzën e ka ngritur një prokuror vendor nga Prokuroria Speciale e Republikës së Kosovës, i cila i ka propozuar Gjykatës që të pandehurit, për veprën penale që akuzohen, t’i shpallë fajtor dhe t’i gjykojë sipas ligjit.

 

 

Fjalë Kryesore:

Të ngjashme