Kryetari i Mitrovicës, Agim Bahtiri ka reaguar ndaj një postimi të kryetarit të Prishtinës, Shpend Ahmeti i cili sot e ka cilësuar si “çështje negociatash dhe bindjesh”, kalimin e komunës së Mitrovicës së Jugut nga zona e kuqe në atë të verdhë.

Bahtiri e ka këshilluar Ahmetin që të merret me punës e komunës së tij, sepse sipas tij, nuk i takon të merret me punët e Mitrovicës.

“E lus kryetarin e Prishtinës, Shpend Ahmeti, që të merret me punët e komunës së tij, sepse nuk i takon me u merr me komunën e Mitrovicës, pasi që mitrovicasit e kanë kryetarin e tyre që kujdeset për ta. Ai është mirë që të merret me komunën e tij, e cila është ngulfatur nga rastet me të infektuar me COVID-19”, ka shkruar në reagimin e tij Bahtiri në Facebook.

Sipas Bahtirit kryeqyteti në rrethana normale duhet të jetë shembull për menaxhim të punëve komunale, por siç ka thënë ai “duket kryetari Ahmeti ka tjera prioritete!”