Doza e tretë e vaksinës – qytetarët presin në radhë, apelojnë për vaksinim të përgjithshëm

Prishtinë | 18 Dhj 2021 | 14:56 | Nga Lindita Berisha Shkarko Videon HD

Për ta shkarkuar videon ju lutem kyçuni ose regjistroni një llogari të re!

| Regjistrohu

Mesditën e së shtunës numër i madh i qytetarëve kanë pritur në radhë në sallën “1 Tetori” në kryeqytet për t’u vaksinuar, raporton Ekonomia Online. Shumica nga ta pas mesazheve të marra nga Ministria e Shëndetësisë, kishin vendosur që të marrin edhe dozën e tretë.

Selim Syla, tha se për shkak të sigurisë më të madhe dhe pasojave në të ardhmen ka vendosur që të vaksinohet edhe për herën e tretë.

Ai u ka bërë thirrje të gjithë atyre që ende nuk e kanë marrë vaksinën të vaksinohen, duke shtuar se ky rekomandim vjen edhe nga ekspertët shëndetësor nga mbarë bota.

“Siguria është më e madhe, mos me pas pasoja më tutje. Mesazh për të gjithë njerizimin, kush mendon pak shëndetin e vet le ta merr edhe dozën e tretë”.

“Le ta marrin, secili e ka përgjegjësinë për vetveten. Normal që është më e mira se e kanë paraparë ekspertët shëndetësor, të gjithë duhet me ardhur me marrë”.

Edhe Sylejman Avdullahu, tha se vaksinën duhet ta marrë secili, ngase kjo është mundësia e vetme për ta mposhtur virusin.

“Mendoj se siguria është më e mirë, vlen me marrë. Vaksina duhet me marrë secili është për sigurinë për të mirën tonë. Më e mira është kjo mundësi, tjetër nuk ka. Unë besoj që është më e mira”.

Arlind Grantolli, tha se pasi ka pranuar mesazhin nga MSh-ja ka ardhur që të vaksinohet me dozën e tretë, pa asnjë dyshim.

Ndonëse marrjen ose jo të vaksinës e konsideron vendim personal, ai thotë se rekomandimet që vijnë nga ekspertët dëshmojnë se s’ka mundësi tjetër për ta evituar virusin, raporton EO.

“Na ka ardhur mesazhi, njoftimi edhe i kemi marrë dy të parat pse mos me marrë edhe të tretën. Po besoj pasi që ekspertët në krejt botën po thonë që po, s’ka pse me menduar ndryshe, kur krejt njerëzit po e marrin, i njëjti sistem po aplikohet në shumicën e shteteve të botës, nuk po shoh që mundet diçka me qenë ndryshe te ne”.

“Kjo është çështje personale, po pasi ekspertët e mjekësisë e sugjerojnë dhe në krejt botën po thonë që një prej mundësive më të mira për t’u mbrojtur edhe për ta evituar virusin është vaksina, atëherë s’po shoh rrugëdalje tjetër”.

Përderisa Arta Bërdynaj, e cila ishte vaksinuar me dozën e parë, të shtunën kishte ardhur ta shoqëronte nënën dhe vajzën që të vaksinohen.

Ajo pati një lutje për të gjithë që ta marrin vaksinën, duke pohuar se nuk ka asgjë të keqe, veç sjell dobi.

“Sot kam ardhur për nënën dozën e tretë dhe vajza dozën e dytë. Besoj që po, nëse është fluksi i virusit kështu besoj që po duhet me marrë”.

“Iu kisha lut që të gjithë me marrë vaksinën se është në të mirën tonë dhe të tjerëve, kurgjo të keqe nuk ka prej saj, veç të mira, na mbron prej virusit”.

Ministria e Shëndetësisë ka njoftuar se në 24 orët e fundit është regjistruar një rast i vdekjes dhe 12 raste të reja me Coronavirus.

Këto rezultate janë konfirmuar pas testimit të mbi 1 mijë e 600 mostrave. Aktualisht, raste aktive në gjithë vendin janë 315.

“Nga 1.679 testime, 12 qytetarë kanë rezultuar pozitiv me virusin COVID-19. Gjatë 24 orëve të fundit, është shënuar 1 rast i vdekjes. Sot janë shëruar 13 qytetarë, derisa numri i përgjithshëm i të shëruarve është 157.954. Në total numri i rasteve aktive është 315”, thuhet në njoftimin e MSh-së.

Të ngjashme