Masat e reja duket se nuk po japin efektin e duhur.

Kjo pasi numri i viktimave vazhdon të jetë i lartë, ani pse numri i rasteve të reja ka shënuar rënie të lehtë.

Përderisa këto masa janë të vlefshme deri më datën 13 të këtij muaji, ndryshimi i tyre mund të ndodhë para kohës së paraparë.

Në një prononcim për GazetaBlic, infektologu kosovar, Salih Ahmeti, ka thënë se gjithçka varet nga propozimet e institucioneve relevante dhe se grupi i ekspertëve duhet t’i bëjë analizat konkrete para se të marrin ndonjë vendim.

“Në momentin e parë që ftohemi për të analizuar situatën pandemike në vend, si infektologë do t’iu bashkohemi grupit të ekspertëve. Realisht, IKSHPK duhet t’i propozojë masat, nëse është e nevojshme e pastaj organet kompetente do të vendosin. Ajo që është e rëndësishme, secila masë duhet të analizohet”, tha ndër të tjera Ahmeti për GazetaBlic.

Në anën tjetër, GazetaBlic, ka tentuar disa herë të marrë një përgjigje nga Ministria e Shëndetësisë lidhur me masat e reja potenciale, por me këta të fundit që kanë zgjedhur të heshtin.