Flet Nebojsha Rosiq pasi Amerika ia sanksionoi djalin

Prishtinë | 09 Dhj 2021 | 14:09 | Nga Ekonomia Online

Nebojsha Rosiq, babai i Marko Rosiq, njërit nga bashkëpunëtorët e Zvonko Veselinoviqit që u fut në listën e sanksioneve nga Departamenti i Thesarit si pjesë e grupit të organizuar kriminal i ka bërë ftesë ambasadorit të ShBA-së në Prishtinë që ta vizitojë familjen e tij dhe t’ia japë gjithë pasurinë që djali i tij Marko Rosiq posedon.

Nebojsha Rosiq tha se ka marrë vesh nga mediat për sanksionet që përfshijnë djalin e tij.

“E lexova në media që djali im është në listën e njerëzve ndaj të cilit ShBA-ja ka ndërmarrë sanksione. Kjo me të vërtetë tingëllon tragjikomike për mua pas gjithë asaj që djali im dhe familja ime ka kaluar që nga dita që Marko është arrestuar”, ka thënë ai për kosovoonline.

Ai tha se është i gatshëm ta dhurojë pasurinë e djalit të tij për ambasadorin e ShBA-së në Prishtinë.

“Unë e ftoj ambasadorin e ShBA-së në Prishtinë të vijë në shtëpinë time dhe unë do t’ia jap gjithë pasurinë e luajtshme dhe të paluajtshme që ka djali im dhe familja ime pasi që e pashë dje se u raportua që djali im është pjesë e krimit të organizuar. Djali im nuk posedon asnjë pasuri të grupeve kriminale dhe jam i befasuar se në çfarë informata janë bazuar ata kur kanë arritur në këtë konkluzion”, tha Rosiq.

Marko Rosiq njëri nga të sanksionuarit e ShBA-së si pjesë e grupit të krimit të organizuar në veri të Kosovës ishte arrestuar në Mitrovicën e veriut më 23 nëntor 2018 dhe është në mbajtje që nga ajo kohë.

Aktakuza e ngarkon atë me përfshirjen në vrasjen e Oliver Ivanoviqit.

Zyra për Kontrollin e Pasurive të Huaja e Departamentit Amerikan të Thesarit ka targetuar rrjetet e korrupsionit disa shtete të evropës dhe Hemisferës Veriore, në mesin e tyre edhe Zvonko Veselinoviqin dhe grupin e tij të krimit të organizuar si përgjegjës për trafikimin e mallrave, parave, narkotikëve dhe armëve mes Kosovës dhe Serbisë njofton kjo zyrë përmes një komunikate për medie.

Në komunikatë ndër të tjera  thuhet se Zvonko Veselinoviq dhe vëllai i tij Zharko Jovan Veselinoviq kanë pasur marrëveshje me politikanë për t’i ndihmuar partitë e tyre për t’i fituar zgjedhjet dhe në këmbim politikanët do t’i garantonin vëllezërve Veselinoviq kontrollë të disa bisneseve në disa rajone.

Lista e grupit të organizuar kriminal të Zvonko Veselinoviqit përfshinë: Marko Rosiq, Andrija Zheljko Bojiq, Srdjan Milivoje Vuloviq, Milan Mihajloviq, Miljan Radisavljevic, Radovan Radiq, Sinisa Nedeljkoviq, Radule Steviq.

Fjalë Kryesore:

Të ngjashme