Kryeministri i Kosovës, Ramush Haradinaj ka reaguar pas ndalimi të Kombëtares së Kosovës për të marrë pjesë në Kampionatin Europian të Karatesë në Novi Sad, kryeqytetin e Vojvodinës. Ai ka thënë se ky veprim është akt i papranueshëm, i papresedan dhe i tmerrshëm, për shekullin 21 të kontekstit të integrimeve europiane dhe nuk i kontribuon normalizimit të marrëdhënieve ndërmjet dy shteteve, transmeton Ekonomia Online.

Haradinaj fillimisht reagoi përmes një postimi në llogarinë e tij zyrtare në rrjetin social “Facebook”.

Më pas, për këtë çështje Zyra e Kryeministrit u ka dërguar medieve një reagim, në të cilin thuhet se kthimi nga Merdarja në shtëpi i karateistëve tanë duke mos i lejuar që të garojnë në një event sportiv është shkelje flagrante e të gjitha Konventave Ndërkombëtare për lëvizje të lirë dhe diskriminim në baza entike.

Në reagim bëhet e ditur se autoritetet serbe janë njoftuar më tre maj për këtë udhëtim dhe pretendimi se ato nuk janë informuar më kohë është i paqëndrueshëm. Po ashtu, Zyra  Ndërlidhëse e Kosovës i ka njoftuar autoritetet e Serbisë për udhëtimin e sportistëve tanë për në Novi Sad.

“Marrëveshja ndërmjet Prishtinës dhe Beogradit për paralajmërimin e vizitave 48 orë përpara ka të bëjë me zyrtarët shtetëror, përkatësisht me politikanët e rangut të lartë, por jo edhe me sportistët. Por edhe sipas kësaj Marrëveshjeje, Serbia është dashur të reagojë pas 24 orëve nëse është kundër vizitës, por këtë nuk e ka bërë”, thuhet në reagim.

Këtë akt ndalese të shtetit serb, të dytin më radhë, brenda një kohe të shkurtë, Qeveria e Kosovës e konsideron të papresedan dhe veprim që sinjalizon se Serbia po qëndron në politikat nacionaliste të konfliktit dhe refuzimit, në vend të bashkëpunimit dhe frymës së vlerave të përbashkëta europiane.