Inspektorati do të shkojë sërish për hetime në vendin e punës ku vdiq 22 vjeçari nga Suhareka

Prishtinë | 25 Shk 2019 | 19:37 | Nga Ekonomia Online

Krenar Jemini nga fshati Mushtisht i Komunës së Suharekës është personi i parë që ka vdekur në vend të punës në vitin 2019.

Ai vdiq paraditen e së dielës në objektin e kompanisë së derivateve “Lab Oil”, e cila gjendet në magjistralen Prishtinë-Ferizaj, raporton KTV.

Gjatë ditës së hënë kompania “Lab Oil” nuk ka lejuar kryeinspektorin e punës, Basri Ibrahimi, që të futet në punishten e saj, për të kryer inspektimet e nevojshme, pas vdekjes së 22-vjeçarit.

Ibrahimi ka thënë se nuk është i kënaqur me këtë dhe ka treguar se të martën do të shkojë përsëri për t’i vazhduar procedurat e nevojshme.

Ai ka thënë se nuk mund të flasë për rastin pa pasur raportet e para, por që në përgjithësi janë duke punuar për sigurinë e punëtorëve.

KTV-ja ka provuar të flasë me pronarë të kompanisë “LAB OIL”, por një person që është paraqitur si rojë e objektit, ka thënë se ata e kanë mbyllur fabrikën për të hënën.


Por, kjo kompani ka dhënë një sqarim të shkruar për versionin e saj të ngjarjes.

Sipas zyrtarëve të saj, i ndjeri kishte rrëshqitur në shiritin transportues të fabrikës, duke marrë lëndime vdekjeprurëse.

Prokuroria këtë po e heton si vdekje të dyshimtë.

Kryeprokurori i Prishtinës, Imer Beka, ka thënë për KTV-në se pos dëshmitarëve, do të ekzaminohen edhe kamerat dhe telefoni i të ndjerit që është gjetur në vendngjarje.

Familjarët e 22-vjeçarit nga Mushtishti i Suharekës nuk kanë dashur të flasin për ngjarjen tragjike.

Por, të afërmit e tij, prapa kamerës, kanë treguar se Krenar Jemini kishte nisur punën në këtë komani para 3 muajve.

Për vdekjet në vendin e punës, sindikata e pavarur e sektorit privat të Kosovës ka fajësuar institucionet, të cilat nuk po bëjnë asgjë për të rritur sigurinë e punëtorëve.

Sipas kësaj sindikate, ky është personi i pestë që vdes gjatë këtij viti në vend të punës.

Ndërkaq, gjatë vitit 2018 kanë vdekur 23 punëtorë. Nga ky numër, sipas Inspektoratit të Punës, 12 ishin punëtorë të ndërtimtarisë.

Të ngjashme