Kurti përkujton Arbenin e Monin: Pakoja e Ahtisaarit ishte diskriminuese, protestuam me të drejtë

Prishtinë | 10 Shk 2020 | 13:52 | Nga Fitore Berisha Shkarko Videon HD

Për ta shkarkuar videon ju lutem kyçuni ose regjistroni një llogari të re!

| Regjistrohu

Kryeministri i vendit, Albin Kurti, ka bërë homazhe tek pllaka përkujtimore e Arben Xheladinit dhe Mon Balajt, të cilët u vranë 13 vjet më parë gjatë protestës ku po kundërshtohej Pakoja e Ahtisaarit, raporton Ekonomia Online.

Kurti ka thënë se kjo protestë nuk ishte e kotë dhe se nuk do ta harrojë kurrë sakrificën e Xheladinit dhe Balajt.

Pakon e Ahtisaarit Kurti vazhdon ta quajë diskriminues, andaj tha se në atë kohë protestuan me shumë të drejtë.

“Para 13 vjetëve ne protestuam paqësisht, mirëpo mu në këtë vend nuk u pritem njësoj. Protestuam kundër diskriminimit të shqiptarëve në Paketën e Ahtisaarit. Aty 37 herë përmendej fjala serb; ndërsa shqiptar vetën një herë. Atëherë kur thuhej komunitetet shqiptare – vetëm njëherë përmendej gjuha shqipe. Ajo paketë vendosi pengesa të mëdha që i kemi edhe sot e kësaj dite”.

“Prandaj me 10 shkurt, protestuam me shumë të drejtë. Ato vendime që u pranuan kollaj nga politikanët dritëshkurtër, sot i kushtojnë shumë Kosovës dhe ia kanë gjymtuar shtetit sovranitetin. Ne po përpiqemi t’i rregullojmë këto gabime, por korrigjimi merr shumë kohë”, tha ai.

Protestën e para 13 vjetësh Kurti e quajti si më masiven që nga paslufta, ndërsa tha se 232 plumba u shkrepën në drejtim të aktivistëve, ndër ta edhe dy viktimave, Monin dhe Arbenin.

“Kjo protestë ishte ndër demonstratat më të mëdha të pasluftës dhe në ballë të saj qëndronte Adem Demaçi. 232 plumba gome u gjuajtën mbi trupat tanë ku u vranë aktivistët Xheladini dhe Balaj. Ku do të ishin ata sot po të mos kishte ndodhur ajo padrejtësi?. Do të ishin aktivistë të ndershëm dhe jo përfitues. Ata ishin të gatshëm të jepnin gjithçka. Ne nuk do të ishim këtu po të mos ishin ata për ta ndriçuar rrugën”.

“Protesta jonë nuk ishte e kotë. Një muaj pas protestës, Ahtisaari ia bashkëngjiti pakos së tij një faqe ku shkruante pavarësi për Kosovën. Pesë muaj pas protestës, OKB e ndaloi përdorimin e plumbave të gomës”.

“Drejtësia ende mungon. Ne kurrë nuk do t’i harrojmë dhe përherë do t’i kultivojmë idealet tona të përbashkëta”, raporton Ekonomia Online.

Të ngjashme