Kuvendi iu blen orë tre zyrtarëve të Administratës, detajet e kontratës

Prishtinë | 27 Qer 2022 | 11:51 | Nga Ekonomia Online

Tre zyrtarë të Administratës së Kuvendit të Kosovës u bënë me ora të dorës në mars të këtij viti. Për këtë, institucioni më i lartë ligjvënës i shtetit u angazhua që nga fundi i janarit.

Për blerjen e këtyre orave, më 26 janar kishte nisur aktiviteti i prokurimit. Më 10 mars u hapën tenderët, ndërkaq katër ditë më vonë, Kuvendi nënshkroi kontratën me “Ora Group SH.P.K”.

Vlera e kontratës ishte 291 euro.

Drejtori i “Ora Group SH.P.K”, Kenan Rushiti, i tha Gazetës Express se orët ishin të personalizuara dhe shkrime “Kuvendi i Kosovës”.

“Kane qenë rreth tri ora. Më duket, se s’e di…”, tha Rushiti.

Ai tha se edhe më herët, ndonjëherë u kanë shitur ora institucioneve.

“Kemi pasë ndonjëherë. Kanë blerë të komunës, bankat”, tha Rushiti.

Për blerjen e këtyre orave, Express nuk ka mundur ta marrë një përgjigje nga Hajrije Hajredinaj, e cila në njoftimin për kontratë figuron si personi kontaktues nga ana e Kuvendit.

Një punonjëse i tha gazetës se ajo është në pushim.



Fjalë Kryesore:

Të ngjashme