MAPL thotë se po përmbyll një vit të suksesshëm, mes “sukseseve” ridizajnimi i webfaqeve

Prishtinë | 11 Dhj 2018 | 19:16 | Nga Ekonomia Online Shkarko Videon HD

Për ta shkarkuar videon ju lutem kyçuni ose regjistroni një llogari të re!

| Regjistrohu

Ministria e Administrimit të Pushtetit Lokal (MAPL) ka mbajtur takimin e fundvitit, për të shënuar të arriturat, si dhe janë prezantuar orientimet për vitin e ardhshëm.

Rozafa Ukimeraj, sekretare e Përhershme në MAPL, ka folur për suksese, në një ndejë me punonjës të kësaj ministrie.

Ndër sukseset, ajo ka numëruar miratimin e Ligjit për Prishtinën, ridizajnimin e webfaqeve të 38 komunave, raporton Ekonomia Online.

“Është miratuar Ligji për Kryeqytetin. Kemi bërë rregulloren për sistemin e menaxhimit të performancës së komunave. Këtë vit qeverisja elektronike ka qenë prioritet yni; me mbështetjen e projektit SDC/DEMOS kemi ridizajnuar web-faqet e 38 komunave”.

“Gjatë këtij viti është rritur përformanca vjetore, është rritur efikasiteti i administratës, ndërsa janë ulur shpenzimet në mallra e shërbime”.

E arritur tjetër, sipas Ukimerajt, është se gjatë këtij viti, MAPL ka arritur përfaqësimin e barabartë gjinor në kuadër të shërbimit civil në të gjitha nivelet.

“MAPL është e përkushtuar në avancimin e qeverisjes lokale duke dhënë kontribut në përmirësimin e qeverisjes lokale”, theksoi ajo.

Sekretarja e Përheshme e MAPL, më tutje shtoi se theks të veçantë vitin e ardhshëm do të kenë në zhvillimin e politikave dhe legjislacionit në fushat e vetëqeverisjes lokale.

“Prioritetet për vitin e ardhshëm janë: përmirësimi i sistemeve online të shërbimeve për qytetarë. Në kuadër të bashkëpunimit ndërkufitar, do të vazhdoj përkrahja e komunave kufitare në vlerë prej 6.3 milion euro” ka thënë Ukimeraj.

Në fund të këtij takimi, janë ndarë mirënjohje për gjashtë punëtorët më të suksesshëm gjatë vitit 2018.

 

Lexo më shumë:

Të ngjashme