Për nder të 10-vjetorit të pavarësisë së Kosovës, sot u bë mbjellja e 116 pemëve në memorialin “Adem Jashari” në Prekaz, në shenjë simbolike për shtetet që e kanë njohur Kosovën.

Në këtë ngjarje morën pjesë ministrja e Mjedisit dhe Planifikimit Hapësinor, Albena Reshitaj, dhe kryetari i komunës së Skenderajt, Bekim Jashari, raporton Ekonomia Online.

Reshitaj përmes këtij aktiviteti simbolik u bëri thirrje shteteve që nuk e kanë njohur Kosovën, ta bëjnë këtë sa më shpejt.

“Kosova është pjesë e Evropës, andaj ne nga ky vend i bëjmë thirrje të gjitha shteteve që nuk na kanë njohur që ta njohin sa më parë që është e mundur Kosovën sepse Kosova po e dëshmon se është për stabilitet, për paqe në rajon dhe këtë nuk mund ta mohojë tashmë askush. Presim që shumë shpejt këto shtete ta njohin vendin tonë”, u shpreh Albena Reshitaj.

Vizitën e ministres Reshitaj, atij maqedonas dhe vizitën e ambasadorëve Jashari e konsideroi të veçantë për Prekazin.

“Vetë simbolika e vizitës së ministres, ministrit të Maqedonisë dhe ambasadorëve, tregon rëndësinë e veçantë që ka ky vend për shtetin tonë të Kosovës që ne dje dhe sot po festojmë në vazhdim 10-vjetorin e shtetit tonë”.