Lirimi i ish-kryetarit të Kuvendit, Kadri Veseli nga paraburgimi në Hagë po kërkohet me ngulm nga avokati i tij, Ben Emmerson.

Ky i fundit në një parashtresë prej 18 faqesh dhe 38 pikash argumentuese të dërguar në gjykatë ka elaboruar arsyet ligjore ndaj Veselit duhet të shfuqizohet masa e paraburgimit.

Avokati i Kadri Veselit, Ben Emmerson, ka thënë se klienti i tij duhet të lirohet nga paraburgimi, pasi që një masë e tillë që aktualisht është në fuqi, nuk është më e justifikueshme.

Në parashtresat e tij, që përmbajnë edhe anekse tjera konfidenciale, Emmerson ka thënë se mbrojtja ka paraqitur kushte të mjaftueshme të cilat sigurojnë se masa e arrestit shtëpiak nuk do të paraqiste rrezik për mbarëvajtjen e procesit gjykues, shkruan lajmi.net.

“Mbrojtja parashtron se paraburgimi nuk është më i justifikuar dhe se qëllimi parandalues i tij mund të arrihet në mënyrë të barabartë duke urdhëruar arrest shtëpie të mbikëqyrur në Kosovë, në varësi të listës së rreptë dhe të rëndë të kushteve të paraqitura më poshtë; bashkëngjitur Shtojcën C – korrespondencë me Drejtorin e Shërbimit Policor të Kosovës). Këto kushte janë hartuar posaçërisht për të adresuar rrezikun e vetëm të pazgjidhur që u gjet nga Gjyqtari i Procedurës Paraprake dhe Dhoma e Apelit për të justifikuar ndalimin e tij të vazhdueshëm – domethënë rrezikun e komunikimit klandestin me mbështetësit e tij politikë në një përpjekje për të ndërhyrë në drejtimin e drejtësisë. Duke iu referuar specifikisht listës së kushteve të propozuara, Drejtori i Forcës së Policisë së Kosovës ka konfirmuar me shkrim se këto kushte mund dhe do të zbatohen në mënyrë efektive, nëse urdhërohen nga DSK si kushte të lirimit të përkohshëm në arrest shtëpiak”, është shprehur Emmerson në parashtresën e tij.

Emmerson në argumentimet e tij ka adresuar gjetjen e vetme mbi të cilën u bazua paneli i Apelit para disa muajsh kur ia refuzoi lirimin Veselit, e cila ka të bëj me pretendimet dhe dyshimet e gjykatësve mbi aftësitë monitoruese të Policisë së Kosovës, pavarësisht se drejtori i kësaj të fundit kishte çuar letër garantuese për ish-kreun e Kuvendit.

“Shkëmbimi i bashkëngjitur i korrespondencës me Drejtorin e Policisë së Kosovës (Shtojca C) konfirmon se këto kushte mund të zbatohen nëse urdhërohen nga DSK. Aty është pohuar se kjo është e mjaftueshme për të adresuar një rrezik të mbetur të identifikuar në çështjen e z. Veseli si një justifikim për vazhdimin e paraburgimit të tij. Mbrojtja parashtron me respekt se nëse Gjyqtari i Procedurës Paraprake kërkon përpunimin e këtij informacioni nga Shërbimi Policor i Kosovës, kursi i duhur është adresimi i një liste specifike të pyetjeve drejtorit. Sidoqoftë, me këtë rast, ndryshe nga ai i fundit, Drejtori ka pohuar aftësinë e SHPK-së(Shërbimit Policor të Kosovës) për të zbatuar kushtet në mënyrë specifike drejtuar ndaj rrezikut të identifikuar nga gjyqtari i procedurës paraprake”, thuhet tutje në kërkesën e Emmerson.

Avokati Emmerson ka përmendur si provë gjithashtu edhe sjelljen e mirë të Veselit gjatë kohës që vizitoi babain e tij në Kosovë nën kushte të rrepta të sigurisë.

Gjithashtu, marrë për bazë dyshimet e shprehura nga ZPS, Emmerson gjithashtu ka përmendur faktin se Veseli para paraburgosjes, kishte arritur marrëveshje me Prokurorinë e Hagës për dorëzimin vullnetar të tij.

Mbi këtë bazë të argumentimit, avokati Emmerson ka kërkuar lirimin e Veselit nën kushtet e propozuara si më poshtë:

Që Veseli të vendoset në arrest shtëpie në adresën e tij të banimit, dhe që një anëtar i Policisë të mbikëqyrë ata që hyjnë ose largohen nga ajo adresë në çdo kohë (qoftë personalisht ose në distancë me përdorimin e një kamere CCTV);

Që Veseli të ndalohet të lërë adresën e tij të banimit në çdo kohë, përveç në rast të urgjencës mjekësore ose ndonjë emergjence tjetër, në këtë rast ai do të qëndrojë në ruajtjen fizike të një oficeri policie në çdo kohë, deri në kthimin e tij;

Që asnjë telefon, pajisje telekomunikuese ose pajisje e mundësuar nga interneti të mos lejohen brenda adresës së banimit në çdo kohë;

Që adresa e banimit të Z. Veseli të kontrollohet përpara mbërritjes së tij për ndonjë telefon të fshehur, pajisje telekomunikuese ose pajisje të mundësuara nga interneti. Prona do të kontrollohet përsëri pas hyrjes së tij, dhe pas kësaj mbi një bazë të rastësishme;

Se personat e vetëm të lejuar për të hyrë në adresën e banimit, përveç familjes së ngushtë të Z. Veseli (gruaja dhe fëmijët) dhe oficerët e policisë, do të jenë personat emrat e të cilëve shfaqen në një listë të para-aprovuar të anëtarëve të familjes dhe personat e tjerë që kanë të drejtë ta vizitojnë atë në vendbanimin e tij.

Që vizitat e personave të lartpërmendur të para-aprovuar te Adresa e banimit të Veselit koordinohen paraprakisht me anë të njoftimit në SHPK;

Që çdo personi që hyn në shtëpi duhet të dorëzojë telefonat, pajisjet e telekomunikacionit ose pajisjet e mundësuara nga interneti para se të hyjë në pronë;

Që çdo person (përfshirë anëtarët e familjes) që hyjnë në pronë të pajtohet me monitorimin pasues të telefonave të tyre, pajisjeve telekomunikuese ose pajisje të mundësuara nga interneti për kohëzgjatjen e periudhës së lirimit të përkohshëm të Z. Veseli;

Që çdo person që hyn ose del nga prona të kontrollohet për posedimin e çdo telefoni, pajisje telekomunikacioni ose pajisje të mundësuar nga interneti, mesazh me shkrim ose dokument tjetër.

Që SHPK të kryejë kontrolle të rastësishme të adresës së banimit të Z. Veseli në mënyrë që të verifikojë nëse Z. Veseli, anëtarët e familjes së tij dhe / ose ata që e vizitojnë atë po respektojnë termat dhe kushtet e lartpërmendura të lirimit dhe, në veçanti, nuk kanë ndonjë telefon , pajisje telekomunikuese ose pajisje të mundësuara nga interneti në adresën e banimit në fjalë;

Që SHPK-ja të njoftojë menjëherë Regjistrin e Dhomave të Specializuara të Kosovës nëse Z. Veseli ose ndonjë nga anëtarët e familjes së tij ose ata që e vizitojnë atë në vendbanimin e tij zbulohet se ka shkelur termat dhe kushtet e lartpërmendura të lirimit.