Importuesit nga Serbia janë futur pa problem në dielën në Kosovë. Në dokumentacionin e tyre ata nuk janë obliguar që t’i referohen Kosovës si Republikë, e as të kërkojnë leje nga Zyra Ndërlidhëse e Kosovës në Beograd për të hyrë në Kosovë. Ata nuk i janë nënshtruar as taksës. Kjo, pasi të gjitha këto vendime janë shfuqizuar nga Qeveria e udhëhequr nga Avdullah Hoti vetëm 3 ditë pas ardhjes në pushtet.

Qeveria e Avdullah Hotit një ditë më parë, në një mbledhje të kabinetit qeveritar, pa votat e partnerit të koalicionit AAK-së, ka hequr masat e reciprocitetit, siç ka thënë, për të vazhduar dialogun me Serbinë pa asnjë pengesë, raporton KOHA. 

E pas këtij vendimi, vetëm gjatë ditës së diel 5 maune me mallra nga Serbia janë futur në Kosovë. Këtë e ka konfirmuar zëdhënësi i Doganës së Kosovës, Adriatik Stavileci, i cili ka thënë se pasi vendimi është marrë gjatë vikendit nuk ka numër të madh të mallrave që janë futur në Kosovë.

Por edhe pas ashpërsimit të masave të reciprocitetit nga ish-Qeveria Kurti, 20 maune me mallra nga Serbia, të cilat në dokumentacione iu referuan Kosovës si Republikë janë futur në Kosovë.

Presidenti i Serbisë, Aleksander Vuçiq, në një intervistë për Radion Evropa e Lirë ka thënë se heqja e masave të reciprocitetit krijon hapësirë për dialogun me Kosovën. Ka thënë se pret ardhjen e përfaqësuesit special të Bashkimit Evropian për dialogun ndërmjet Serbisë dhe Kosovës, Mirosllav Lajçak, pas zgjedhjeve të 21 qershorit në Serbi.