Një grup qytetarësh në mënyrë të organizuar kanë protestuar para ndërtesës së Qeverisë kundër vaksinimit të detyrueshëm. Ata paralajmëruan se do ta dërgojnë në Gjykatën Kushtetuese vendimin e Qeverisë për vaksinim, raporton Ekonomia Online.

Pjesëmarrësit e kësaj proteste janë parë duke qëndruar afër njëri-tjetrit pa maska. Vetëm një numër i vogël i tyre respektuan masat anti-Covid.

Arian Xhezairi, organizator i kësaj proteste, tha se nuk do të lejojnë që vaksinimi të bëhet i detyrueshëm.

“Kryeministri e ka shti në terr popullatën dhe nuk do me dëgjua për askënd. Nuk respektohen të drejtat tona dhe me Kushtetutë është shkelje e të drejtave tona. Andaj nuk lejojmë që dhunshëm me u shpu, dhe as fëmijët tanë nuk do i lejojmë të na i vaksinojnë”, tha ai.

Edhe organizatori tjetër, Arianit Sllamniku, tha se kjo është padrejtësi ndaj tyre, andaj të hënën në ora 13:00 do jenë tek Gjykata Kushtetuese për ta dërguar këtë ankesë

Tutje ai tha se nuk do lejojnë që të shkelen të drejtat e tyre dhe që t’u imponohet diçka pa dëshirë.

“E kanë shkelur nenin 26 të Kushtetutës që kanë të bëjnë me raporton e individit dhe procesin e vaksinimit”, tha Sllamniku.

Që nga muaji gusht, Qeveria e Kosovës ka miratuar masat e reja për luftim të pandemisë së Coronavirusit.

Në mesin e masave është përfshirë edhe dëshmia për vaksinim kundër këtij virusi për të hyrë në klube të natës, diskoteka, dasma dhe ahengje tjera familjare. Po ashtu edhe për punonjësit e insitutcioneve publike nga e hëna duhet të posedojnë certifikatën e vaksinimit për vaksinimin e plotë ose marrjen e një dozë të vaksinës kundër Covid-19, për t’iu lejuar hyrja në ambientet e punës.

Në mungesë të dëshmisë për vaksinim, duhet të prezantohet testi negativ në Coronavirus, jo më i vjetër se 72 orë, testi antigjen jo më i vjetër se 48 orë, ose dëshmia për tejkalim të koronavirusit brenda 180 ditëve.