Seanca në rastin ‘Syri i Popullit’ shtyhet për një orë

Prishtinë | 16 Kor 2018 | 11:15 | Nga

Seanca e paraparë të mbahet ne rastin e njohur si ‘Syri i Popullit’ u shty për të paktën një orë dhe pritej të filloj pas orës 12.

Arsyeja e shtyrjes sipas sekretarit juridik të gjyqtares Naime Jashanica është se Policia e Kosovës nuk e ka sjellë të akuzuarin Halim Halimi edhe pse ka pasur urdhëresë.

Kjo seancë  ka qenë e paraparë të mbahet të premten por për shkak te gjendjes shëndetësore te gjyqtarit Vesel Ismajli qe është anëtar i trupit gjykues është shtyrë për sot.

Jashari, njëri nga të pandehurit e këtij rasti akuzohet në lidhje me sulmin që ndodhi ndaj avokatit Azem Vllasi, i cili ishte plagosur në mars të vitit të kaluar në afërsi të banesës së tij në Prishtinë.

Avokatja e Murat Jasharit, Fehmije Gashi– Bytyqi pretendon se i mbrojturi i saj veproi në gjendje të paaftësisë mendore dhe për këtë qëllim kërkon që Jashari të mos jetë pjesë e gjykimit por t’i nënshtrohet trajtimit.

Përveç Murat Jasharit dhe Bajrush Konjushës të akuzuarit tjerë të këtij procesi gjyqësor janë Avni Llumnica, Ragip Sallova, Sadri Ramabaja, Rexhep Topllana, Bajrush Konjusha, Sabit Berisha, Halim Halimi, Bexhet Luzha dhe Lirije Luzha.

Prokuroria Speciale ngriti aktakuzë ndaj tyre më 28 shkurt.

Mbi 10 të akuzuarit rëndojnë  vepra penale  duke filluar  hakmarrje, ndihma, dhunimi, përgatitja e veprave terroriste ose veprave penale kundër rendit kushtetues dhe sigurisë së Republikës së Kosovës, mbajtja në pronësi, kontroll ose posedim të paautorizuar të armëve dhe hakmarrje.

Sipas prokurorisë, të akuzuarit planifikonin shkatërrimin e strukturave themelore politike, kushtetuese, ekonomike apo shoqërore të Republikës së Kosovës me sulme dhe me vrasje ndaj personaliteteve më të larta shtetërore duke filluar nga ish-funksionarët e lartë të Kosovës prej vitit 1980 deri në 1991, duke i konsideruar si tradhtarë të vendit, e po ashtu funksionarët nga viti 1999 deri në vitin 2016.

Kallxo.com e kishte siguruar aktakuzën ndaj të akuzuarve si pjesëtarë të “Syrit të Popullit”.

Sipas aktakuzës, organizata kishte grupe guerile, ndërsa kërkonte që Enver Hoxha të njihej si hero.

Fjalë Kryesore:

Të ngjashme