BE-ja i dhuron Kosovës 30 respiratorë

Prishtinë | 04 Gus 2020 | 11:58 | Nga Ekonomia Online Shkarko Videon HD

Për ta shkarkuar videon ju lutem kyçuni ose regjistroni një llogari të re!

| Regjistrohu

Bashkimi Evropian i ka dhuruar Ministrisë së Shëndetësisë një kontingjent prej 30 respiratorësh për të ndihmuar Kosovën në luftën kundër pandemisë.

Pakoja e fundit e ndihmës kap vlerën e 900 mijë eurove dhe përmban 30 ventilatorë, 200 pulsi-oksimetër e 20 makina elektrokardiografike, të cilat i ka dorëzuar zëvendësambasadori i BE-së në Kosovë, Riccardo Serri.

Pranimin e tyre e ka bërë ministri i Shëndetësisë, Armend Zemaj, i cili ka falënderuar BE-në për ndihmën e vazhdueshme që po ia bën Kosovën në luftën me pandeminë.

“Kjo ndihmë e sotme dhe ky kontingjent i ventilatorëve do të ndihmojë shumë në organizim, të cilin po e bëjmë së bashku me SHSKUK-në në ndarjen e përgjegjësive për të ndihmuar çdo qytetar që mund të jetë infektuar dhe po përballet me jetën nga pandemia COVID-19”, ka thënë Zemaj.

Ai ka thënë se kjo ndihmë do të lehtësojë luftën me COVID-19 dhe punën e profesionistëve shëndetësorë.

“Kjo ndihmë është vlerësim i madh, i nevojshëm, i domosdoshëm dhe shpresojmë që çdo jetë e shpëtuar do të jetë falënderim tepër i arsyeshëm dhe i konsiderueshëm për taksapaguesit evropianë dhe për ju që po e ndihmoni Republikën e Kosovës”.

“Me këtë angazhim do të na lehtësoni luftën ndaj pandemisë COVID-19, do t’ua lehtësoni punën profesionistëve shëndetësorë”, ka thënë ministri pas pranim-dorëzimit të kontingjentit.

Ushtruesi i detyrës së drejtorit të SHSKUK-së, Valbon Krasniqi, e ka vlerësuar lart kontributin e Bashkimit Europian për Kosovën në luftën me pandeminë COVID-19.

“Në emër të SHSKUK-së dhe profesionistëve shëndetësorë, ju falënderojmë për ndihmën e vazhdueshme që i keni dhënë Kosovës. Bashkimi Europian e ka ndihmuar Kosovën jo vetëm me pajisje, por edhe në forma tjera”.

“Kërkoj, sërish, që të respektohen masat dhe rekomandimet e institucioneve, në mënyrë që sa më pak të përdoren këto mjete”, tha Krasniqi.

Lexo më shumë:

Të ngjashme