Sigurohen paratë e nevojshme, Hamza premton 24 orë ujë të pijshëm për Fushë-Kosovën

Prishtinë | 18 Gus 2018 | 10:36 | Nga

Shumë shpejt qytetarët e komunës së Fushë-Kosovës do të kenë furnizim me ujë të pijshëm 24 orë në ditë. Kjo pasi që ministria e Financave (MF) thotë se ministri Bedri Hamza ka arritur pajtueshmërinë ndërmjet Bankës Gjermane për Zhvillim (KfW) dhe KRU ”Prishtina”sh.a, përmes propozimeve konkrete për të amandamentuar marrëveshjen e projektit nga Faza e III e projektit për ndërtimin e Fabrikës për ujë të pijshëm në Shkabaj, transmeton Ekonomia Online.

Në këtë mënyrë, sipas MF-së, mjetet e mbetura në projekt do të përdoren për furnizimin me ujë për qytetarët e komunës së Fushë-Kosovës dhe përmirësimin e mëtutjeshëm të furnizimit me ujë për qytetarët e komunës së Prishtinës.

“Ministri Hamza pas një angazhimi të madh ka mundësuar zgjidhjen e këtij problemi shumë vjeçar dhe shumë të rëndësishëm për qytetarët e komunës së Fushë-Kosovës”, thuhet në komunikatën për medie nga MF.

Përveç këtij investimi, me këtë amandamentim parashihen edhe investime tjera për Komunën e Prishtinës, siç janë:

  1. Vendosja e pompës shtytëse nga Stacioni i Pompave Mirdita II në Rezervuarin Mirdita III në Matiqan;
  2. Rehabilitimi i rrjetit (zëvendësimi i rrjetit të vjetër me rrjetin e ri) të ujësjellësit në Bregun e Diellit – Zona Qendër dhe Zona e Perëndimit në Prishtinë;
  3. Rehabilitimi i rrjetit (zëvendësimi i rrjetit të vjetër me rrjetin e ri) të ujësjellësit në Lagjen e Medresesë në Prishtinë.

 

Të ngjashme