Presidenti i vendit, Hashim Thaçi, ka kujtuar viktimat e sulmit terrorist të 11 shtatorit, ku humbën jetën me mijëra persona, ndër ta edhe tre shqiptarë.

Sot në 16 vjetorin e përkujtimi të tyre, Thaçi ka thënë se populli i Kosovës do të jetë gjithmonë përkrah popullit amerikan.

Postimi i Thaçit në Facebook:

Dita e 11 shtatorit 2001 ishte më e kobshmja në shekullin e sapofilluar për mbarë botën, por veçanërisht për popullin mik amerikan.

Sulmet terroriste ndaj Qendrës Botërore të Tregtisë në Nju Jork dhe ndaj Pentagonit ishin shumë mizore.

Ndonëse ditë e rëndë për mbarë botën e qytetëruar, ajo u bë edhe ditë e kthesës së madhe në historinë botërore.

Sulmet mbi kullat binjake, ku humbën jetën mijëra persona, më pas binjakëzuan shumë shtete e popuj në luftë të përbashkët kundër terrorizmit, të cilat, të udhëhequra nga SHBA-ja ngadhënjyen në këtë luftë.

Populli i Kosovës do të jetë gjithmonë përkrah popullit mik amerikan dhe sot kujtojmë viktimat e 11 shtatorit 2001 me nderime të larta shtetërore.