AAK-Nisma presin rezultate nga debati i 3 gushtit

Prishtinë | 26 Kor 2016 | 10:34 | Nga

Me datën 3 gusht pritet të mbahet debati rreth Demarkacionit me Malin e Zi në mes deputetëve dhe ekspertëve të demarkacionit. Ndërsa, pjesë e këtij debati pritet që të jenë edhe partitë opozitare, AAK dhe NISMA, të cilat e kanë kundërshtuar versionin  parë të vijës kufitare me Malin e Zi.

Kurse të pyetur nga Indeksonline dy partitë opozitare AAK dhe Nisma për Kosovën kanë konfirmuar pjesëmarrjen e tyre në këtë debat.

Zëdhënësi i AAK-së Muharrem Nitaj ka thënë për Indeksonline se AAK do të marrë pjesë në këtë debat që pritet të rezultojë me vërtetimin e shqetësimeve të tyre për demarkacionin me Malin e Zi.

“Ne besojmë se ky debat do të rezultojë me vërtetimin e shqetësimeve tona se demarkacioni me Malin e zi, nuk është i saktë dhe është në dëm të Kosovës”, ka thënë Nitaj.

Gjithashtu Nitaj, ka shtuar se pas këtij debati të ekspertëve beson se deputetët do të kenë argumente shtesë për të votuar kundër demarkacionit me Malin e Zi.

“Pas këtij debati të ekspertëve, besojmë se deputetët do të kenë argument shtesë për të votuar kundër marrëveshjes së demarkacionit, në mënyrë që ky proces të hyjë në një fazë të një zgjidhjeje të mirëfilltë”, ka shtuar Nitaj.

Ndërsa sekretari i partisë Nisma për Kosovën Bilall Sherifi ka konfirmuar pjesëmarrjen e liderit të tyre Fatmir Limaj dhe deputetëve të NISMA-së në debatin e organizuar me datën 3 gusht.

“Po, kryetari Limaj dhe deputetët e Nisma për Kosovën do të marrin pjesë në debatin e 3 gushtit”, ka thënë Sherifi.

Ndërsa i pyetur se çfarë presin nga ky debat, Sherifi ka thënë se “presin që deputetët të binden se ky version i demarkacionit nuk duhet të votohet”.

“Nga ky bashkëbisedim i deputeteve me ekspertet, qe do te zhvillohet me 3 gusht, Nisma pret qe deputetet te binden se ky version i demarkacionit nuk duhet te votohet”, ka përfunduar Sherifi.

Fjalë Kryesore:

Të ngjashme