Administrata e Biden: Kurti detyrohet ta respektojë Marrëveshjen e Washingtonit

Prishtinë | 21 Qer 2021 | 21:11 | Nga Ekonomia Online

Administrata amerikane ka thënë për T7 se marrëveshja e Washingtonit është një zotim që detyrimisht duhet të respektohet, pasi administrata Biden e ka studiuar me kujdes të tërën. Kjo deklaratë erdhi pas intervistës së zëdhënësit të Qeverisë, Përparim Kryeziu, për Ekonomia Online.

Për marrëveshjen e firmosur në Shtëpinë e Bardhë nga Avdullah Hoti e Aleksandër Vuçiq, kryeministri i tanishëm gjithmonë shprehi rezervat e tij.

Kjo marrëveshje siç shkruante Albin Kurti vetëm pak ditë pas nënshkrimit, do duhej të shikohej nga poshtë, meqë siç vlerësonte ai, e vetmja pikë e vlefshme është vendosja e raporteve dhe njohja reciproke me Izraelin.

Madje, Kurti thoshte se “nëse ai do ta rimarrë sërish udhëheqjen e qeverisë, nuk do të jetë i obliguar ta zbatojë marrëveshjen e Washingtonit”.

E këtë qëndrim ndaj marrëveshjes së Washingtonit, po vazhdon ta mbajë edhe tani kur i njëjti po udhëheq me ekzekutivin.

Zëdhënësi i Qeverisë, Përparim Kryeziu në një intervistë për Ekonomia Online tha se marrëveshja e Washingtonit nuk ka vlerë juridike.

LEXO EDHE:

Kjo deklaratë e zëdhënësit të Qeverisë nxiti reagime.

Opozita e konsideroi veprim të rrezikshëm që mund të armiqësoj mardhëniet mes Kosovës dhe SHBA-së.

Ndërkohë, marrëveshjen e Washingtonit dhe çdo marrëveshje tjetër të nënshkruar mes Kosovës dhe Serbisë, Administrata Biden kërkon që palët ta zbatojnë.

Madje në një përgjigje për T7, ata thonë se kjo marrëveshje është një zotim që detyrimisht duhet të respektohet, pasi administrata Biden e ka studiuar me kujdes të tërën.

“Ne besojmë se vendet e kanë detyrim të respektojnë marrëveshjet dhe zotimet që janë bërë më herët. Për shembull, administrata e Biden e studioi me kujdes marrëveshjen e Uashingtonit që Z. Vuçiq dhe Hoti arritën në Shtëpinë e Bardhë dhe erdhën në përfundimin se këto janë gjëra që duam t’i shohim tek palët, të vazhdojnë të ecin përpara – të rrisin tregtin, të rrishin investimet, të rritet përpjekja për të luftuar terrorizmin etj. ”

Marrëveshja e nënshkruar më 4 shtator të 2020-ës mes Kryeministrit të atëhershëm të Kosovës dhe Presidentit të Serbisë, përmban 16 pika.

E njëjta u nënshkrua në prani të ish-presidentit amerikan, Donald Trump.

Të ngjashme