AKR-ja pendohet për koalicionin me Nismën

Prishtinë | 19 Nën 2019 | 20:34 | Nga Ekonomia Online

Ish-deputeti i AKR-së në Kuvendin e Kosovës, Islam Pacolli, ka komentuar rezultatet e zgjedhjeve të 6 tetorit dhe zhvillimet e fundit politike në vend.

Pacolli, në “Dossier D” në RTV Dukagjini ka thënë se AKR do të vepronte ndryshe nëse do të shkohej përsëri në zgjedhje.

Ai ka thënë se koalicioni me NISMA-n ka qenë në rregull, por si e vetme AKR do të delte më mirë në zgjedhje.

“AKR si e vetme do të qëndronte më mirë, pasi ndonjëherë edhe elektorati në koalicione nuk përputhet. Edhe si e vetme besojmë se do ta kalonim pragun”.

Ish-deputeti i AKR-së thotë se sigurisht kanë pritur rezultate më të mira pasi ndryshe do të shkonin në zgjedhje.

Pacolli ka ironizuar edhe me kalimin e Albena Reshitajt në AAK në kohën kur kjo e fundit ishte ministre.

“Nuk e di nëse dikush në ndonjë vend do të jepte dorëheqje nga posti i ministrit për t’u bërë këshilltare e kryeministrit”.

Zyrtari i AKR-së thotë se janë duke pritur certifikimin e zgjedhjeve e më pas do të diskutojnë nëse do të përfshihen apo jo në qeveri.

“AKR gjithmonë ka ofruar shumë kuadro në qeverisje por propagandën nuk e ka bërë për punët e mira”, tha ndër të tjera Islam Pacolli.

Të ngjashme