66 vota për, asnjë kundër dhe 10 abstenime Kuvendi i Kosovës ka votuar Qeverinë e re të Republikës së Kosovës gjatë ditës së djeshme.

Me shumicë votash Kuvendi i Kosovës ka votuar Qeverinë e re dje, me ç’rast lideri i Lëvizjes Vetëvendosje Albin Kurti është zgjedhur kryeministër. Gjatë ditës së djeshme po ashtu kryetare e re e Kuvendit u zgjodh nënkryetarja e LDK-së Vjosa Osmani. Me anë të këtij hapi u jetësua marrëveshja LVV – LDK për arritjen e koalicionit qeverisës, sipas së cilës palët ishin marrë vesh që posti i kryekuvendarit t’i kalohej Lidhjes Demokratike të Kosovës, shkruan sot gazeta Zëri.

66 vota për, asnjë kundër dhe 10 abstenime Kuvendi i Kosovës ka votuar Qeverinë e re të Republikës së Kosovës gjatë ditës së djeshme. Me këtë rast kryeministër i ri i Kosovës është zgjedhur lideri i Lëvizjes Vetëvendosje Albin Kurti. Derisa Lista Serbe ka abstenuar, partitë e ish-koalicionit PAN kanë lëshuar sallën në momentin kur është votuar përbërja e qeverisë “Kurti”. Pas votimit kryeministri i zgjedhur Albin Kurti u zotua se do të jetë kryeministër i gjithë qytetarëve të Kosovës, pa asnjë dallim. Me votimin e djeshëm të përbërjes së Qeverisë së re, sipas shefit të ri të ekzekutivit, u jetësua vullneti i qytetarëve i shprehur më 6 tetor 2019. Ndërkohë seanca e djeshme, e cila zgjati mbi gjashtë orë, u përshkua me kritika e akuza të ashpra të opozitës karshi shefit të ri të ekzekutivit. Përfaqësuesit e PDK-së, të AAK-së e të Nismës e kritikuan atë për mosnjohje të Republikës së Kosovës, për ndryshim qëndrimesh e për etje për pushtet. Menjëherë pas seancës së djeshme, ku u votua Qeveria, u mbajt edhe një seancë tjetër, në të cilën me 65 vota pro të deputetëve kryeparlamentare e re u zgjodh nënkryetarja e LDK-së Vjosa Osmani.

Kurti: Po e hapim një kapitull të ri

Kryeministri i zgjedhur i Republikës së Kosovës, Albin Kurti, në fjalimin e tij të parë pasi mori votat për të ardhur në këtë pozitë, u zotua se do të jetë kryeministër i gjithë qytetarëve të Kosovës. Gjatë fjalimit të tij ai tha se me votimin e djeshëm të përbërjes së ekzekutivit u jetësua vullneti dhe shpresa e krijuar nga populli kosovar më 6 tetor. “Sot po e hapim një kapitull të ri në Kosovë. Ajo që ngjau e pamundur ishte kështu vetëm në dukje, sepse një popull që refuzon të nënshtrohet e bën gjithçka të mundur. Këtë e kemi bërë më 6 tetor, këtë po e bëjmë sot që me krijimin e kësaj Qeverie po jetësojmë entuziazmin dhe shpresën e krijuar më 6 tetor”, u shpreh Kurti.

Gjatë fjalimit të tij kreu i Vetëvendosjes tha se më 6 tetor nuk ka fituar as LVV-ja, as LDK-ja, por ka fituar populli i Kosovës i cili asnjëherë nuk është nënshtruar as nga sunduesit e jashtëm, as nga sundimtarët e brendshëm. “Sot nuk ka fituar LVV-ja e as LDK-ja, sot kanë fituar qytetarët të cilët çdoherë kur janë përballur me padrejtësi janë ngritur në këmbë, sepse jemi popull kryengritës, popull që nuk nënshtrohemi e nuk përulemi. Ne të gjithë jemi vetëm kalimtarë e shërbëtorë që punojmë në emër të popullit e për popullin. Ne të gjithë jemi të zëvendësueshëm, por populli mbetet i përhershëm. Unë zotohem se do të jap maksimumin e aftësive dhe të kapacitetit tim për të mirën e qytetarëve pa asnjë dallim”, ka nënvizuar kreu i LVV-së.

Me votimin Qeverisë së re, siç Kurti u shpreh, nis edhe rruga e sjelljes së ndryshimit. “Sot do të jem kryeministër i gjithë juve dhe do ta dëgjoj zërin e gjithë juve, sidomos kur nuk pajtohemi. Sot fillon rruga jonë e punës së madhe e të palodhshme për ta sjellë ndryshimin, që të gjithë e kemi pritur”, ka theksuar Kurti.
 

Osmani: E kemi për detyrë t’i jetësojmë fjalët e dhëna

Pas votimit të Qeverisë dhe pas zgjedhjes në pozitën e kryeparlamentares, Vjosa Osmani tha se LVV-ja dhe LDK-ja e kanë për obligim t’i çojnë përpara premtimet që kanë dhënë para qytetarëve. “Ajo që mund të them është se do ta keni përkrahjen e plotë në detyrat që janë të shenjta, sepse vullneti më 6 tetor ka qenë i shenjtë. E kemi për detyrë që fjalët e dhëna t’i jetësojmë dhe t’i çojmë deri në fund. Do t’ia kthejmë dinjitetin Kuvendit edhe për shkak të kualitetit që e shoh në grupet parlamentare”, deklaroi ajo.

Osmani tutje tha se është nder i veçantë që të marrë mandatin për ta kryesuar Kuvendin e Kosovës. “Është nder shumë i madh që me besimin tuaj të zgjidhem për ta drejtuar Kuvendin e Kosovës”, shtoi ajo.

Për arritjen e “Koalicionit të shpresës” dhe për formimin e institucioneve të reja falënderimi më i madh sipas Osmanit u takon qytetarëve të Kosovës, që asnjëherë nuk reshtën së besuari se vota e tyre është ajo që do ta sjellë ndryshimin e madh në Republikën e Kosovës.

Kurti zotohet se do të jetë gardian i parasë publike

Para se të zgjidhej kryeministër i Kosovës Albin Kurti para deputetëve prezantoi programin qeverisës, me ç’rast tha se LVV-ja dhe LDK-ja do të jenë gardianë të parasë publike përgjatë mandatit qeverisës. Gjatë paraqitjes së programit Kurti premtoi reforma në arsim, në shëndetësi, në ekonomi e në sektorë të tjerë. “Kemi një program, i cili adreson secilën fushë dhe prek secilin qytetar. Me këtë program ne jetësojmë premtimet e 6 tetorit, të kësaj dite që shënoi ndryshimin e madh politik në vend e të cilin ne sot po e institucionalizojmë së bashku me qeveri të re. Do të jemi qeveri e kursimit të parasë publike. Ashtu edhe siç po e shihni, prapa meje do të jenë 15 ministra dhe jo 21 sa ishin më herët”, ka theksuar Kurti.
Duke e prezantuar programin qeverisës kreu i Vetëvendosjes premtoi departizimin dhe depolitizimin e agjencive dhe ndërmarrjeve publike. “Do t’i reduktojmë e do t’i ristrukturojmë ato e do të vendosim indikatorë të matshëm të performancës për ta rregulluar cilësinë e për ta matur suksesin dhe dështimin. Do ta departizojmë shërbimin e jashtëm përmes një rishikimi funksional, të bazuar në performancë dhe në rezultate”, deklaroi Kurti.

Ndërkohë Qeverinë e re Kurti e quajti qeveri të zhvillimit ekonomik dhe të punësimit. “Do të jemi qeveri e zhvillimit ekonomik dhe e punësimit. Për ta ndalur migrimin masiv, për ta nxitur punësimin e për ta rritur produktivitetin na duhet një program që nxit zhvillimin ekonomik, prandaj do të mbështesim zhvillimin e ndërmarrësisë në tërësi me fokus të veçantë ndihmën për ndërmarrjet e vogla, të mesme dhe industritë prodhuese”, vazhdoi ai.

Ndër të tjera ai premtoi mbylljen e Agjencisë Kosovare të Privatizimit, e cila do të transformohet në një agjenci brenda Qeverisë.

Krejt në fund të deklarimit së tij Kurti u shpreh i gatshëm që si kryetar i ekzekutivit ta udhëheqë edhe dialogun me Serbinë, proces ky që ka nisur në vitin 2011. “Me Serbinë do ta kthejmë reciprocitetin e plotë tregtar, ekonomik e politik. Jam i gatshëm që t’i udhëheq bisedimet e ardhshme me Serbinë. Do të kem ekip gjithëpërfshirës për bisedime, në kuptimin politik, etnik, shoqëror dhe profesional”, potencoi kryeministri tashmë i zgjedhur.

Veseli paralajmëron opozitë të fuqishme, Kurtin e quan mashtrues
 

Në seancën e djeshme përfaqësuesit e opozitës kanë adresuar një sërë kritikash në drejtim të kryeministrit të ri të Kosovës. Kreu i Partisë Demokratike të Kosovës, Kadri Veseli, ka thënë se Kurti nuk njeh e as nuk e ndien Republikën e Kosovës si shtet të tij. “E vërteta e parë është se si po e lëmë Kosovën sot, të cilën ti Albin Kurti as nuk e njeh, as nuk e ndien dhe as nuk e mendon si vend për të jetuar. E vërteta e dytë, fatkeqësisht tregon se ti je sot këtu mbi rrënojat e një tregimi të zi për shtetin dhe për shtetësinë e Kosovës. Ti ke protestuar kundër gjithçkaje të mirë që i ka ndodhur Kosovës. Ke sulmuar policët më të mirë dhe institucionet e Kosovës”, ka thënë Veseli

Duke theksuar se nuk do ta votojnë qeverinë “Kurti”, Veseli paralajmëroi një opozitë të fuqishme. “PDK-ja do të kërkojë përgjegjësi për temat më të ndjeshme të Kosovës që nga paslufta. Do t’i hapim dhe do t’i diskutojmë këtu krejt marrëveshjet e arritura në dialog për ta mësuar të vërtetën a ka tradhti a jo. Nëse ti shkon në dialog pa kërkuar falje Serbia, pa u kthyer eshtrat e secilit shqiptar, siç ke premtuar, a je tradhtar a jo? Do të flasim për taksën e vendosur ndaj Serbisë. A do ta heqësh ti apo jo? Do të flasim për të gjitha pasurimet në Kosovë, privatizimet dhe tenderimet”, shtoi ai.

Në kuadër të këtyre temave Veseli përmendi edhe një sërë çështjet të tjera, për të cilat tha se me ardhjen e Qeverisë së re të gjitha ato duhet të trajtohen. “Do të flasim për krimet e komunistëve jugosllavë mbi shqiptarët në Kosovë. Do të flasim edhe për vrasjen e Astrit Deharit, me emrin e të cilit keni abuzuar dhe keni akuzuar çdo kundërshtar politik, duke përfshirë këta që i keni në koalicion”, shtoi ai. Krejt në fund ish-kryetari i Kuvendit tha se koalicioni LVV – LDK do jetë koalicion i pazareve dhe se nuk do të marrë asnjë vendim të mirë për Kosovën.

Ndërkohë deputetja e Aleancës për Ardhmërinë e Kosovës, Teuta Haxhiu, kritikoi Kurtin për shkelje të premtimeve të dhëna. “Ne e dimë se jeni mashtrues, por çdo ditë do ta kuptojnë edhe qytetarët”, deklaroi Haxhiu, teksa u shpreh e bindur se Qeveria e udhëhequr nga Kurti do të jetë qeveri jetëshkurtër.
 

Limaj: Kurti s’e ka idenë se si udhëhiqet shteti

Pa kritikuar Kurtin nuk la as kreu i Nismës Socialdemokrate Fatmir Limaj, i cili gjatë fjalës së tij para se të votohej Qeveria numëroi një varg akuzash kundrejt kreut të Vetëvendosjes. Në kuadër të kësaj Limaj sugjeroi kryeministrit të ri ta ulë kokën dhe të sillet si kryetar i Qeverisë. “Albini ka shumë punë për t’u përmirësuar dhe për të ndryshuar nga ai Albini i opozitës. Ai duhet t’ua ndërpresë njerëzve të vet gjuhën e urrejtjes. Historia e Kosovës nuk fillon me juve e as me neve. Nderoni e respektoni ata njerëz që ishin para jush. Hiqeni arrogancën, euforinë ndaleni dhe shërojeni urrejtjen që e keni mbjellë te qytetarët”, tha ai.

Opozitarizmi i Kurtit sipas kreut të Nismës nuk është histori me të cilën i pari i LVV-së duhet të mburret. “Ju keni qenë kundër Rambujesë, si rezultat i kësaj Kosova ka fituar lirinë. Keni qenë kundër Paketës së Ahtisaarit, madje është derdhur gjak. Ju duhet të punoni sa më shumë që të harrohet opozitarizmi juaj”, potencoi ai, teksa tha se Kurti nuk e ka idenë se si udhëhiqet shteti.

Kabineti i qeverisë “Kurti”

Me 66 vota për të deputetëve të Kuvendit të Kosovës Albin Kurti (LVV) u zgjodh kryeministër i Kosovës, Avdullah Hoti (LDK) zëvendëskryeministër i parë, Haki Abazi (LVV) zëvendëskryeministër i dytë, Glauk Konjufca (LVV) ministër i Punëve të Jashtme dhe të Diasporës, Blerim Reka (LVV) ministër i Integrimit Evropian, Albulena Haxhiu (LVV) ministre e Drejtësisë, Hykmete Bajrami (LDK) ministre e Arsimit, e Shkencës, e Teknologjisë dhe e Inovacionit, Besnik Bislimi (LVV) ministër i Financave dhe i Transfereve, Agim Veliu (LDK) ministër i Punëve të Brendshme dhe i Administratës Publike, Rozeta Hajdari (LVV) ministre e Ekonomisë, e Punësimit, e Tregtisë, e Industrisë, e Ndërrmarrësisë dhe e Investimeve Strategjike, Anton Çuni (LDK) ministër i Mbrojtjes, Lumir Abdixhiku (LDK) ministër i Infrastrukturës dhe i Ambientit, Besian Mustafa (LDK) ministër i Bujqësisë, i Pylltarisë dhe i Zhvillimit Rural, Arben Vitia (LVV) ministër i Shëndetësisë, Vlora Dumoshi (LDK) ministre e Kulturës, e Rinisë dhe e Sportit, Emilia Rexhepi (Grupi 6+) ministre e Administrimit të Pushteti Lokal, Dalibor Jevtiq (Lista Serbe) ministër për Komunite dhe Kthim dhe Ivan Millojeviq (Lista Serbe) ministër për Zhvillim Rajonal.

Thaçi mirëpret formimin e Qeverisë, kërkon kompensim për kohën e humbur

Pak minuta pas votimit të Qeverisë së re presidenti i Kosovës, Hashim Thaçi, ka uruar përbërjen e re të ekzekutivit. Me këtë rast ai u ka bërë thirrje partive, të cilat janë pjesë e Qeverisë që sa më parë të nisin t’i përmbushin zotimet e dhëna. “E mirëpres votimin e sotëm të deputetëve të Kuvendit të Republikës së Kosovës për krijimin e Qeverisë së re. Duke uruar kabinetin e ri qeveritar, i ftoj të fillojnë sa më shpejt punën për përmbushjen e premtimeve të dhëna karshi qytetarëve, duke kompensuar ditët e humbura dhe duke vazhduar angazhimin institucional për përmirësimin e jetës së qytetarëve tanë”, ka deklaruar Thaçi. Republika e Kosovës, siç kreu i shtetit është shprehur, ka para vetes sfida të shumta të cilat mund të tejkalohen vetëm me punë, me përkushtim, me përgjegjësi dhe me përgjegjshmëri shtetërore.

Për zgjedhjen në pozitën e kryeministrit Albin Kurtin e ka uruar edhe lideri i LDK-së Isa Mustafa. “Uroj kryeministrin Albin Kurtin për zgjedhjen e tij dhe të kabinetit qeveritar. Ecëm ngadalë, me vështirësi, por arritëm në cak. Kosova sot kompletoi të gjitha institucionet e saj. Pritjet janë të mëdha, ashtu sikurse edhe premtimet, por Qeverisë duhet dhënë hapësirë të punojë normalisht. Nuk e ka lehtë”, ka deklaruar Mustafa.

Ndërkombëtarët urojnë Kurtin, bëjnë thirrje për rifillim të dialogut

Menjëherë pas zgjedhjes së Qeverisë së re në krye me Albin Kurtin janë deklaruar edhe përfaqësues të bashkësisë ndërkombëtare, të cilët e kanë uruar qeverinë “Kurti” për fillimin e mandatit. Duke i uruar mirëseardhje Qeverisë së drejtuar nga Kurti, ambasadori amerikan në Prishtinë, Philip Kosnett, ka thënë se mezi pret të punojë me ekzekutivin e ri. “Urime për formimin e Qeverisë së re. Mezi pres të punoj me të gjitha institucionet e Kosovës, me partitë tjera dhe me palët e interesuara të shoqërisë civile për ta forcuar drejtësinë e prosperitetin dhe për të ndihmuar Kosovën të ndërtojë marrëdhënie paqësore me fqinjët e saj”, ka thënë Kosnett.

Të njëjtën gjë e ka pohuar edhe Ambasada Gjermane në Kosovës, e cila përmes një reagimi ka inkurajuar Qeverinë e re t’i nisë reformat në shtetin e Kosovës. “Si partner i gjatë i institucioneve të Kosovës, Ambasada Gjermane mezi pret të vazhdojë bashkëpunimin tonë, të mbështesë shtetin e ligjet në Kosovë dhe zhvillimin ekonomik të vendit. Ne inkurajojmë Qeverinë e re të nisë zbatimin e agjendës së saj ambicioze të reformës për këtë vend dhe të rifillojë dialogun me Serbinë në një proces negociatash të strukturuar mirë të lehtësuar nga BE-ja”, thuhet në reagimin e Ambasadës.
Edhe ambasadori i Britanisë së Madhe në Kosovë, Nicholas Abbott, ka uruar Qeverinë e re, me ç’rast ka thënë se shumë shpejt duhet të adresohen disa çështje urgjente, duke përfshirë buxhetin shtetëror për vitin 2020, vendimet e bllokuara administrative dhe sundimin e ligjit. “Më 6 tetor kosovarët votuan për ndryshim. Qeveria e re duhet të tregojë guxim dhe kreativitet në implementimin e dëshirave të votuesve dhe shpresave të të gjithë kosovarëve”, deklaroi Abbott.

Kurtin e ka uruar edhe kancelari austriak Sebastian Kurz, i cili ka thënë se mezi pret të bashkëpunojë me të. “Urime Albin Kurtit për formimin e një qeverie të re në Kosovë. Mezi pres të punoj me ju dhe të mbështes integrimin e Kosovës në BE”, ka deklaruar ai.
Të njëjtën gjë e ka pohuar edhe shefja e Zyrës së Bashkimit Evropian në Kosovë, Natalia Apostolova.