Ali Ahmeti reagon pas ftesës së Speciales për Kadri Veselin: I dashur vëlla, paska qenë e shkrume

Prishtinë | 08 Nën 2019 | 11:23 | Nga Ekonomia Online

Kryetari i BDI-së, Ali Ahmeti përmes një shkrimi në Facebook ka reaguar pas ftesës që Gjykatës Speciale për Kadri Veselin.

Ahmeti në shkrim me fjalë prekëse i është drejtuar Veselit me fjalët vëlla, bashkëmendimtar e bashkëluftëtar.

Tutje Ahmeti ka shkruar se ftesa nga Gjykata Speciale paska qenë e shkruar.

“Na paska qenë e shkruar, jo nga Perendia, por nga hasmi, ai i dituri dhe ai i strukuri, që çdo ditë të lume ta dëshmojmë pastërtinë dhe dinjitetin e luftës tonë çlirimtare nga zgjedha e kasapit të Ballkanit”,ka shkruar kryetari i BDI-së.

Ahmeti ka shkruar se edhe ai edhe Veseli edhe një jetë po ta kishin do ta bënin të njejtën gjë pa iu dridhur qerpiku.

“E di që edhe ti, si edhe unë, edhe një jetë po ta kishim, do ta bënim të njejtën, pa ndryshuar pikë as presje, pa na u dridhur qerpiku, e as pa u menduar as edhe një herë të vetme. Kjo është padrejtësi, por ti do të ngadhnjesh ndaj saj ashtu siç bashkë ngadhnjyem në luftën tonë të drejtë”, ka shkruar Ahmeti.

Postimi i plotë:

I dashur vëlla Kadri, bashkëveprimtar, bashkëluftëtar, bashkëmendimtar, shoqërues dhe bashkëndërtues i rrugës sonë të përbashkët për liri, pavarësi, demokraci.

Na paska qenë e shkruar, jo nga Perendia, por nga hasmi, ai i dituri dhe ai i strukuri, që çdo ditë të lume ta dëshmojmë pastërtinë dhe dinjitetin e luftës tonë çlirimtare nga zgjedha e kasapit të Ballkanit.

E nga Perendia na qenka përcaktuar detyrimi që t’i bëjmë ballë shpifjeve, denigrimeve, nënçmimit, propagandës dhe lajmeve të rreme nga ai i dituri edhe ai i strukuri në mënyrë që ta mbrojmë dinjitetin e luftës, e çdo pike gjak të derdhur, e çdo plage, të secilit dëshmor, martir dhe invalid, të çdo istikame, të çdonjërës shkrepje, të secilit lot të derdhur nga sytë e nënave tona.

E di që edhe ti, si edhe unë, edhe një jetë po ta kishim, do ta bënim të njejtën, pa ndryshuar pikë as presje, pa na u dridhur qerpiku, e as pa u menduar as edhe një herë të vetme.

Kjo është padrejtësi, por ti do të ngadhnjesh ndaj saj ashtu siç bashkë ngadhnjyem në luftën tonë të drejtë.

Fjalë Kryesore:

Të ngjashme