Këshilltari i presidentit Hashim Thaçi, Artan Behrami i ka reaguar deputetes së Vetëvendosjes, Fitore Pacolli pas deklaratës së saj se Ramush Haradinaj e ka dërguar nënën e tij për shërim jashtë vendit.
Ai e ka quajtur skandaloze deklaratën e saj. Kjo sipas tij është vetëm një reflektim i doktrinës dogmatike të Vetëvendosjes.
Behrami ka shkruar se Vetëvendosje fillimisht e njollosën dhe zhveshën nga kredibiliteti çdo institucion në Kosovë, për ta krijuar kultin e udhëheqësit të tyre si institucionin absolut në Kosovë.
Ky është postimi i tij i plotë:
Deklarata skandaloze e deputetes Fitore Pacolli është vetëm një reflektim i doktrinës dogmatike të Vetëvendosjes.
Fillimisht e njollosën dhe zhveshën nga kredibiliteti çdo institucion në Kosovë, për ta krijuar kultin e udhëheqësit të tyre si institucionin absolut në Kosovë!
Tash po i sulmojnë edhe nënat e heronjve, që murin e sakrificës e shtynë përtej kufijve të imagjinatës, për t’i krijuar hapësirë shenjtërimit të liderit të tyre!
Nënat si institucion i shenjtërisë nuk mund të zëvendësohen nga ata që me çdo kusht dëshirojnë të shndërrohen në baballarë të shenjtë!