Ministri në detyrë për Europën dhe Punët e Jashtme, të Shqipërisë, Gent Cakaj ka pritur në një takim kryetarin e Drenasit, Ramiz Lladrovcin dhe atë të Skënderajt, Bekim Jasharin, raporton Ekonomia Online.
“Sot pata nderin e rrallë të pres Kryetarin e Skënderajt, Bekim Hamëz Jashari dhe Kryetarin e Drenasit, Ramiz Tushë Lladrovci, në një takim të përzemërt në Tiranë. Biseduam për punën e tyre shumë të vyer në zemër të Drenicës, drejtësinë e pastërtinë e luftës së Ushtrisë Çlirimtare të Kosovës e rëndësinë e patjetërsueshme të bashkëpunimit mes Republikës së Kosovës e Shqipërisë”, ka shkruar ai.
Temë diskutimi sipas Cakajt ka qenë edhe domosdoshmëria e ruajtjes së shumicës shqiptare në Bujanoc.
“Po ashtu, theksuam edhe domosdoshmërinë e ruajtjes së shumicës shqiptare në Bujanoc. Kjo e fundit, është edhe detyrë historike edhe nevojë institucionale për shqiptarët e Luginës së Preshevës. Sakrifica sublime e familjes Jashari e Lladrovci ndër breza për lirinë e Kosovës duhet të shërbejë si burim frymëzimi për gjithë shqiptarët kudo ndodhen”, ka shkruar Cakaj në Facebook.