Sekretari i Degës së PDK-së në Prishtinë, Bujar Cakolli, është përfshirë në diskutimin për Flamurin e shtetit të Kosovës në Prishtinë, për vendosjen e të cilit ka nisur nënshkrimi i një peticioni në rrjete sociale.

Cakolli, i cili është dhe zv.ministër i Inovacionit dhe Ndërmarrësi, paralajmëron se “Flamuri shtetëror i Republikës së Kosovës do të valoj krahpërkrah me Flamurin tonë kombëtar më 17 shkurt 2018, tek rrethi në Prishtinë”.

Postimi i plotë i Bujar Cakollit:

Prishtina dhe qytetarët e saj shënojnë 10 vjetorin e jetës së lirë, në Shtetin e Lirë e të Pavarur. Por sot, qytetarët e lirë në Prishtinën e lirë nuk po e jetojnë festën e merituar.

E rëndë ta shohësh Prishtinën sot stisur në rutinën e vikendit të këtij fillimshkurti pa festë, pa entuziazëm -pa asgjë!

Sido të jetë, një është e sigurt se, Prishtina në të gjitha stinët dhe kohët e saj ka pasë e do të ketë njerëz që e duan e respektojnë dhe mburren me të.

Prishtinasit i kanë nderuar e do t’i nderojnë përjetë Dëshmorët dhe Heronjtë tanë, dhe Festat kombëtare e shtetërore

Ku janë udhëheqësit zëfuqishëm të drejtuesve të Prishtinës?

Ku është zotimi i tyre deri në piskellimë se i vlerësojnë e respektojnë vlerat shtetërore, se kujdesen për shtet e sovranitet dhe punojnë për Bashkim?

A është kjo tashmë retorikë terse e shpërfaqur edhe në këtë 10 vjetor?

Por një gjë është më se e sigurtë, Flamuri shtetëror i Republikës së Kosovës do të valoj krahpërkrah me Flamurin tonë kombëtar me 17 shkurt 2018, tek rrethi në Prishtinë!