Anëtari i Kryesisë së Partisë Demokratike të Kosovës, Petrit Hajdari, pas numrit rekord të rasteve me Coronavirus, ka kritikuar Qeverinë e Kosovës e sidomos ministrin e Shëndetësisë, Arben Vitia.
Këto komente Hajdari i bëri përmes një shkrimi në Facebook, në të cilin shkruan se Vitia është “treguesi më i saktë i një qeverie që po kalbet nga brenda”.
Postimi i plotë:
Vitia si simptomë
Numri rekord i rasteve me Covid 19, përveç se të papërgatitur, e gjen Qeverinë e Kosovës krejt shpërfillëse ndaj jetëve të njerëzve. Arben Vitia nuk është shkaktari por simptoma: ai është treguesi më i saktë i një qeverie që po kalbet nga brenda.
Gjejnë kohë për gjithçka, përveç shëndetit të njerëzve të cilët i shohin si numra në kutitë e votimit, prandaj dhe procesi i vaksinimit e merr valën vetëm në prag të zgjedhjeve lokale. Sepse për pushtetin, qytetari ose është votues, ose është i pavlefshëm.
Ju kujtohet kur Kurti mburrej me rezultatin 100 ditor të rënies së rasteve? Krejt e pavërtetë. Rastet kanë variuar në raport me valët e shpërndarjes që i ka pasur sëmundja, e jo në raport me vendimet a masat qeveritare. Dhe kjo gënjeshtër del në pah sot kur, nëse bien rastet, qeveria ka meritë kurse nëse rriten rastet, faji i lihet popullit.
Qeveria po kalb nga brenda me padije e dashakeqësi, Arben Vitia është simptoma e kësaj kalbjeje.