Sekretari i Përgjithshëm i NATO-s, Jens Stoltenberg, ditë më parë deklaroi për mediet serbe se pa përmbushjen e disa kushteve, apo pëlqimin e përfaqësuesve të pakicave etnike në Kosovë nuk do të ketë transformim të Forcës së Sigurisë së Kosovës në ushtri.
Stoltenberg gjithashtu ka thënë se është e rëndësishme që shndërrimi i FSK-së në ushtri të kryhet në përputhje me të gjitha rregullat dhe Kushtetutën.
Këtë deklaratë të zyrtarit të NATO-s, profesori i çështjeve të sigurisë, Abit Hoxha e sheh si qëndrim të qartë edhe të BE-së dhe Washingtonit.
Hoxha në një prononcim për Ekonomia Online ka thënë se interpretimi i kësaj deklarate qartëson se NATO e dëshiron ushtrinë, por jo në mënyrë aq të thjeshtë.
Ai ka thënë se kjo deklaratë sa është pozitive, po aq edhe sfiduese për lidershipin kosovar.
“Unë këtë e shoh si hap shumë pozitiv, por edhe sfidues për shtetin e Kosovës. Sfidë të cilën duhet kaluar lidershipi i Kosovës duke bashkëpunuar edhe me subjekte politike që deri më tani kanë qenë më të vështira në këtë aspekt”, ka thënë ai.
I pyetur nëse Kosova duhet të bëjë prapë një kompromis me Serbinë për çështjen e ushtrisë, Hoxha ka thënë se kjo nuk do të ndodhë. Ai themelimin e ushtrisë e sheh si shumë pozitive edhe për vet serbët që jetojnë në Kosovë.
“Unë nuk shoh këtë veprim si punë kompromisi në dëm të Kosovës por e shoh si çështje praktike, pra serbët dëshirojnë të krijojnë kushte të vetë-administrimit në disa aspekte dhe institucionet e Kosovës duhet të punojnë në këtë aspekt. Ky veprim bile duhet parë si mundësi e mirë për t’i integruar pjesët veriore të Kosovës në gjirin e Kosovës dhe për ta forcuar sundimin e ligjit në veriun e Kosovës”, ka thënë ai.
Edhe Hoxha beson se ushtria e Kosovës nuk mund të krijohet në kushte të përkohshme dhe afatshkurtra, por duhet krijuar në bazë të themelit të shtetit të Kosovës, pra në bazë të Kushtetutës së Kosovës.