Kryetarja e Komisionit parlamentar për Integrime Evropiane, Blerta Deliu-Kodra, ka pritur sot në takim ambasadorin e Hungarisë në Kosovë, Laszlo Markusz.
Në këtë takim, Markusz ka thënë se Hungaria është e gatshme të vazhdojë mbështetjen ndaj Kosovës në procesin e integrimit evropian, transmeton Ekonomia Online.
Sipas një komunikate nga Kuvendi i Kosovës, Deliu-Kodra e falënderoi ambasadorin për përkrahjen e vazhdueshme që Hungaria i ka dhënë Kosovës, ndërkaq, e njoftoi atë për të arriturat dhe sfidat me të cilat Kosova është duke u ballafaquar gjatë procesit të integrimeve.
Kryetarja e Komisionit gjithashtu e falënderoi ambasadorin edhe për bashkëpunimin parlamentar lidhur me ndihmën nëpërmjet ekspertëve të integrimeve evropiane në kuadër të Projektit të Binjakëzimit.
Markusz po ashtu vlerësoi edhe rolin e Komisionit për Integrime Evropiane, veçanërisht lidhur me procesin e liberalizimit të vizave dhe mbikëqyrjes së përmbushjes së agjendës për reforma evropiane.