Idenë e korrigjimit të kufirit, Thaçi do ta prezantojë edhe në konferencën e Frankofonisë në Armeni

Prishtinë | 09 Tet 2018 | 18:17 | Nga Ekonomia Online

Presidenti Hashim Thaçi ka thënë se idenë e tij për korrigjimin e kufirit me Serbinë dhe bashkëngjitjen e Luginës së Preshevës me Kosovën, do ta diskutojë edhe në konferencën e Frankofonis, e cila mbahet gjatë kësaj jave në Armeni, transmeton Ekonomia Online.

Thaçi, përmes një postimi në Facebook ka thënë se këtë premtim ua ka dhënë njerëzve të botës akademike, të biznesit, ish-përfaqësuesvetë UÇPMB-së, kryesisht nga Lugina e Preshevës, të cilët thotë se i ka takuar dje dhe sot.

“Ishte konkludim i përbashkët se është moenti historik që të jetësohet e drejta legjitime e qytetarëve të kësaj treve, e deklaruar më 1 dhe 2 mars 1992, në kuadër të dialogut ndërmjet shtetit të Kosovës dhe atij të Serbisë”, ka shkruar Thaçi.

Postimi i plotë i Thaçit: 

Dje dhe sot, kisha kënaqësinë të takoj njerëz të botës akademike, të biznesit, të rinj, studentë, ish-përfaqësues të UÇPMB-së, të diasporës shqiptare, përfaqësues të shoqërisë civile dhe gazetarë, kryesisht nga Lugina e Preshevës.

Bashkëngjitja e Preshevës, Medvegjës dhe Bujanocit ishte kryetema e bisedave tona. Ishte konkludim i përbashkët se është momenti historik që të jetësohet e drejta legjitime e qytetarëve të kësaj treve, e deklaruar më 1 dhe 2 mars 1992, në kuadër të dialogut ndërmjet shtetit të Kosovës dhe atij të Serbisë.

Me arritjen e marrëveshjes Kosovë–Serbi, përparësitë e Kosovës do të jenë: njohja reciproke, njohja e Kosovës edhe nga pesë shtetet anëtare të BE-së, rrugëtimi i sigurt për në NATO dhe BE, si dhe anëtarësimi në OKB.

Të gjithë bashkëbiseduesve u premtova, gjë e cila do të konfirmohet, se në të gjitha takimet e mia në Konferencën e Frankofonisë në Jerevan të Armenisë, do ta diskutoj mundësinë e korrigjimit të kufijve, me mundësi reale për bashkëngjitje të Luginës së Preshevës me Kosovën.

Të ngjashme