Isa Mustafa nesër mbledh partinë, vendoset për Kryeministrin

Prishtinë | 29 Dhj 2020 | 19:04 | Nga Ekonomia Online

Kryetari i LDK’së, Isa Mustafa, të mërkurën në orën 14:00 do të mbledh Kryesinë e partisë ku edhe pritet që të caktohet kandidati për kryeministër për zgjedhjet e parakohshme, data e të cilave do të vendoset menjëherë pasi të publikohet Aktgjykimi i plotë i Kushtetueses për votën e deputetit Etem Arifi, shkruan Gazeta Express.

Një gjë të tillë për Gazetën Express e ka konfirmuar anëtari i Kryesisë së LDK’së, Selim Kryeziu.

“Takimi është thirrur për në orën 14:00. S’ka ndonjë pikë të veçantë. Ta shohim nesër”, ka thënë Kryeziu.

Megjithatë ai pret që nesër LDK-ja të avancojë tutje dhe të caktojë emrin e kandidatit për kryeministër.

“Unë mendoj dhe shpresoj të caktohet. Kam kërkuar edhe ne mbledhjen e kaluar të mos vonohemi në këtë drejtim”, ka thënë Selim Kryeziu për Express.

Të shtunën kryeministri Avdullah Hoti ka deklaraur se LDK do të vendos brenda dy-tre ditëve për emrin e kandidatit për kryeministër. Edhe Agim Veliu të hënën ka treguar se shumë shpejtë LDK do të ketë emrin e kryeministrit.

Tre emrat që janë përfolur si të mundshëm për të fituar besimin e Kryesisë dhe Këshillit të Përgjithshëm të LDK’së si kandidat për kryeministër, janë Lutfi Haziri, Lumir Abdixhiku e Kujtim Shala.

Megjithatë as emri i Avdullah Hotit nuk përjashtohet si emër i mundshëm për pozitën e shefit të ekzekutivit.

Deri tani, Enver Hoxhaj i PDK’së ka zyrtarizuar kandidaturën për kryeministër.  Lëvizja Vetëvendosje pritet që me Kurtin t’i futet kësaj gare zgjedhore.

NISMA me shumë gjasë do të garojë bashkë me PDK’në në një koalicion parazgjedhor, meqë sot Limaj ka thënë se po e presin ofertën nga Enver Hoxhaj.

Vjosa Osmani me shumë gjasë do të kandidojë bashkë në listën e Lëvizjes Vetëvendosje. Haxhi Avdyli ka thënë se brenda kësaj jave do të sqarohet gjithçka.

Të ngjashme