Deputeti i Kuvendit të Kosovës nga radhët e PDK-së, Uran Ismaili, ka reaguar pas shtimit të madh të të infektuarve me Covid-19 në Kosovë.

Ismaili tha se është bërë një muaj që nga PDK-ja ka kërkuar ndalimin e zinxhirit të infektimeve, por që kjo nuk ka ndodhur, siç tha ai Qeveria Kurti u tregua e shurdhër edhe ndaj rekomandimeve të OBSH-së për sa më shumë testime.

Me tej, Ismaili shkruan se Albin Kurti dhe Qeveria e tij nuk kanë plan kundër pandemisë e as të ekonomisë.

Mes tjerash, Ismaili ka thënë se Kosova ka numrin më të ulët të testimeve për kokë banori në rajon dhe është shumë larg modeleve të suksesshme të luftës kundër Covid-19.

Derisa kërkon të dijë se ku kanë mbetur 7000 testet që erdhën në Kosovë? Ku mbeten testet nga Turqia? Dhe, më e rëndësishmja, kur do të mbërrijmë në 1000 teste në ditë?, shkruan Ekonomia Online.

Postimi i plotë i Ismailit në Facebook:

Është bërë një muaj prej kur PDK ka kërkuar testime agresive, për ta ndalur sa më shpejtë zinxhirin e infektimeve me Covid-19. E kemi përsëritur, pastaj, disa herë këtë nevojë. Fatkeqësisht, kjo nuk ka ndodhur.

Qeveria Kurti u tregua e shurdhër edhe ndaj rekomandimeve të OBSH-së për sa më shumë testime, sepse virusi nuk mund të luftohet – kur nuk e di se ku ndodhet ai.

Të gjithë liderët e suksesshëm, që po menaxhojnë vendet e tyre në këtë kohë pandemie, janë të fokusuar në hapat që minimizojnë dëmet në popullatë dhe në shtet. Kanë plan kundër pandemisë dhe plan për ekonominë.

Albin Kurti dhe Qeveria e tij nuk e kanë as njërën dhe as tjetrën.

Albin Kurti dhe Qeveria tij janë spektatorë dhe pandemia është betejë e qytetarëve dhe e mjekëve. Për Kurtin, mjafton të na porosisë që të mbyllemi në shtëpi dhe t’i lajmë duart, se do të kalojë.

Kosova ka numrin më të ulët të testimeve për kokë banori në rajon dhe është shumë larg modeleve të suksesshme të luftës kundër Covid-19.

Ku mbeten 7000 testet që erdhën në Kosovë? Ku mbeten testet nga Turqia? Dhe, më e rëndësishmja, kur do të mbërrijmë në 1000 teste në ditë?

Testimet janë politikë ekskluzive e Qeverisë. Janë përgjegjësi direkte e Kryeministrit Kurti dhe Ministrit Vitia. Nuk mund ta organizojë askush tjetër këtë. Nuk është punë e mjekëve, por është çështje që kërkon lidership politik – e që kjo Qeveri shihet qartazi se nuk e ka.

Konferencat për media, sado që mund ta qetësojnë publikun, nuk e ndalin virusin.

Tashmë kur numri i të prekurve nga Coronavirusi në Kosovë po rritet, testimet masive janë urgjente dhe Qeveria duhet të veprojë menjëherë. Nuk ka më kohë të humbet, nëse dëshirojmë ta fitojmë këtë betejë me sa më pak dëme.