Avokati Arianit Koci, ka folur rreth publikimit të propozim-aktakuzës ndaj presidentit Hashim Thaçi dhe kryetarit të Partisë Demokratike të Kosovës, Kadri Veseli.

Koci në Rubikon në Klan Kosova deklaroi se kjo është vetëm aktakuzë e deponuar.

“Kjo është një aktakuzë e cila është e deponuar dhe në fazën tjetër konfirmohet ose jo, si një formë është e përfunduar prokurori e ka krijuar besimin se është vepër penale, por pastaj kësaj aktakuze i lëshohet edhe një kontroll”.

Veç tjerash Koci tregon edhe parregullsitë e publikimit të saj nga Prokuroria Speciale në Hagë.

“Ky është rasti i parë që pa u konfirmuar aktakuza publikohen emrat, edhe kjo nuk është rastësi”.

“Nuk i di konkret të gjitha rrethanat pasi s’i kam parë provat, mirëpo mendoj se Prokuroria e ka bërë me mirëbesim pasi këtyre dyve ua ka zbuluar emrat e të tjerëve jo. Argumentet e vërteta do të zbulohen kur tregon Prokuroria çka ka menduar kur ka thënë se po ndërhyjnë në drejtësi”.

“Konfirmimi i aktakuzës bëhet ndërmjet Prokurorisë dhe gjyqtarit paraprak, rregulli 85 deri 90 paraqesin se deri në momentin e konfirmimit janë të dyshuar e kur të konfirmohet janë të akuzuar”.

Koci thotë se publikimi i kësaj aktakuze të deponuar është i menduar mirë nga Prokuroria e Specializuar veçse nuk dihen motivet.

“Veprim i menduar mirë i Prokurorisë, mirëpo nuk dihet nëse ka ndonjë motiv, motivin e gjejmë tek paragrafi ku thuhet se kinse kanë bërë përpjekje ta pengojnë drejtësinë”.

“Lajmi ka dal në faqen edhe Gjykatës edhe Prokurorisë, një që e tillë nuk është e lejuar, Dole thotë se kjo nuk është zbulim i aktakuzës por vetëm një informacion, kjo për mu si mbrojtës mbetet gjë e mirë për të mbrojtur klientin tim”.

Koci mes tjerash deklaroi se aktakuza e dytë pritet në gusht – ku siç theksoi na pret një verë e nxehtë.

“Aktakuza e dytë pritet në gusht, do të kemi verë të nxehtë. Pritet që në korrik e gusht të dalë një rezultat, e pastaj vazhdohet me procedurat tjera”.

Mirëpo Koci deklaroi se përfundimi i aktakuzës merr kohë.

“Është lëndë voluminoze dhe gjykata nuk mundet aq shpejt të arrijë në përfundim – po flitet për 100 vrasje dhe 11 të akuzuar”.