Komisioni për Punë të Brendshme, Siguri dhe Mbikëqyrjen e Forcës së Sigurisë së Kosovës ka organizuar tryezë pune lidhur me mbikëqyrjen e shpenzimeve financiare të Ministrisë së Punëve të Brendshme.
Kryetari i këtij Komisioni, Daut Haradinaj tha se tryeza lidhur me mbikëqyrjen e shpenzimeve financiare të Ministrisë së Punëve të Brendshme ka ardhur si rezultat i gjetjeve të mangësive edhe në Raportin e Progresit, raporton Ekonomia Online.
Zëvendësministri i Punëve të Brendshme, Valdet Hoxha tha se duke u bazuar në të gjeturat e auditorit flitet për një sistem të përmirësimit financiar.
“Ne kemi vlerësuar që nga 17 rekomandimet që kanë dalë nga auditori asnjë nga ato nuk është vërejtje thelbësore, sidomos në aspektin e menaxhimit financiar apo prokurimit”, tha ai.
“Edhe këto rekomandime të cilat janë në proces sidomos në aspektin e punëtorëve me kontratë ushtrues detyre ne kemi hapur konkurset por ministria e financave nuk i ka aprovuar për shkak të aspektit buxhetor dhe përkundër vullnetit tonë këto të gjetura vazhdojnë të jenë mangësi”, shtoi ai.
Ndërsa lidhur me raportin e auditorit zv. ministri Hoxha tha se MPB-ja e konsideron real.