Komunat kërkojnë ndryshimin e masave të ndalimit të qarkullimit

Prishtinë | 27 Mar 2020 | 12:31 | Nga Ekonomia Online

Kryetarët e Komunave përmes Asociacionit të Komunave të Kosovës (AKK) kërkojnë ndryshimin e masave rreth ndalimit të qarkullimit të qytetarëve dhe automjeteve private.

“Siç jemi në dijeni, Qeveria e Republikës së Kosovës ka vendosur në një nga mbledhjet e saja të ndalohet qarkullimi i qytetarëve dhe automjeteve private, nga 24 mars 2020, gjatë orës 10:00 – 16:00 dhe prej orës 20:00 – 06:00, përveç për nevoja mjekësore, prodhim, furnizim dhe shitje të mallrave esenciale (ushqim dhe barna për njerëz dhe kafshë/shpezë), dhe për shërbime dhe aktivitete që ndërlidhen me menaxhim të pandemisë (menaxhmenti dhe personeli esencial qeveritar dhe komunal nga këta sektorë: shëndetësi, siguri dhe administratë shtetërore), si masë për mbrojtje nga koronavirusi apo COVID-19”, thuhet në komunikatë.

“Mirëpo, AKK në konsultim me kryetarë të komunave vlerëson se jashtë këtij orari, sidomos prej orës 16.00-20.00 po ka turma të njerëzve që dalin për t’u furnizuar apo kryer obligime tjera dhe kjo po vlerësohet si mundësi potenciale për përhapjen e virusit. Duke marrë parasysh se epidemiologët kosovarë po bëjnë thirje që qytetarët e Kosovës të qëndrojnë në shtëpi, e sidomos në javët në vijim, Asociacioni i Komunave të Kosovës kërkon që ky vendim të rishqyrtohet dhe kjo masë të pezullohet dhe të zëvendësohet me ndalim qarkullimi prej orës 18:00-06:00”, thuhet më tej.

AKK thotë se kërkesa e tyre do të jetë masë shtesë e drejtpërdrejtë në parandalimin e COVID-19.

Në anën tjetër, thonë se të gjitha strukturat e Komunave dhe Shtabet Komunale për Emergjencë janë duke e kryer detyrat me përgjegjësinë më të madhe të mundshme.

Të ngjashme