KQZ: Pas vendimit të Thaçit e kemi ndërprerë planin operacional për zgjedhjet në Podujevë

Prishtinë | 14 Mar 2020 | 18:47 | Nga Ekonomia Online

Komisioni Qendror i Zgjedhjeve (KQZ) bën të ditur se kanë vendosur që ta ndërpresin zbatimin e planit operacional për organizimin e zgjedhjeve të jashtëzakonshme në Podujevë.

Sipas njoftimit të KQZ-së thuhet se ata kanë kërkuar nga Presidenti Hashim Thaçi anulimin e këtyre zgjedhjeve.

“Komisioni Qendror i Zgjedhjeve, pas pranimit të Vendimit të Presidentit të Republikës së Kosovës për shtyrjen e datës së këtyre zgjedhjeve, ka vendosur që të ndërpresë zbatimin e planit operacional për organizimin e këtyre zgjedhjeve”, thuhet në këtë njoftim.

Njoftimi i plotë:

KQZ e konsideron të nevojshme të njoftojë qytetarët e Republikës së Kosovës se pasditen e së shtunës (14 mars 2020) ka kërkuar nga Presidenti i Republikës së Kosovës, z. Hashim Thaçi shtyrjen e datës së zgjedhjeve të jashtëzakonshme për Kryetar Komune në Podujevë, të parapara të mbahen më 15 mars 2020.

Kjo kërkesë e Komisionit Qendror të Zgjedhjeve është bërë pas rekomandimit të institucioneve përgjegjëse dhe profesionale, si Instituti Kombëtar i Shëndetësisë Publike të Kosovës dhe Komitetit për Monitorimin e Sëmundjeve Ngjitëse të Ministrisë së Shëndetësisë (14 mars 2020) që “të pezullohen përkohësisht zgjedhjet e 15 mars 2020 në Podujevë për të parandaluar përhapjen e COVID-19 në Republikën e Kosovës”.

Komisioni Qendror i Zgjedhjeve, pas pranimit të Vendimit të Presidentit të Republikës së Kosovës për shtyrjen e datës së këtyre zgjedhjeve, ka vendosur që të ndërpresë zbatimin e planit operacional për organizimin e këtyre zgjedhjeve.

Fjalë Kryesore:

Të ngjashme