Kryetari i Kuvendit të Republikës së Kosovës, Glauk Konjufca, ka pritur sot në takim shefin e Zyrës Ndërlidhëse të Sllovakisë në Kosovë, Rastislav Kostilnik, i cili e ka uruar për detyrën e re dhe konstituimin e institucioneve të dala nga zgjedhjet e 14 shkurtit.

Kryekuvendari Konjufca e falënderoi z.Kostilnik për urimin dhe shprehu interesimin për thellimin e bashkëpunimit mes dy vendeve. Duke folur për mundësitë e bashkëpunimit, z.Konjufca shfaqi shpresën se në një të ardhme të afërt zgjerimi i marrëdhenieve bilaterale do të kulmojë me njohje të Kosovës nga Sllovakia.

Në takim u diskutua edhe për zhvillimet aktuale politike, situatën me pandeminë, si dhe masat e ndërmarra për  sigurimin e vaksinave kundër Covid-19.